曾俊華-MaD-min

曾俊華 係一個會打開僵局嘅人

社民連班友仔,一直以嚟用陳德章案嚟攻擊 曾俊華 ,但陳德章檢唔檢控,未必到 曾俊華 決定,因為呢個係警方同律政司嘅決定,社民連係監粗攞嚟屈。而 曾俊華 係唔係一個打開僵局嘅人,其實作為一個曾經有機會親身接觸 曾俊華 同林鄭月娥嘅人,如果我係要打開僵局,停止依家大撕裂嘅局面,我一定係揀 曾俊華 而唔會係林鄭月娥。

曾俊華 喺MaD 2010見八十後反高鐵苦行青年

大家都睇到當年 MaD 2010 見過曾俊華嘅人嘅說詞,無錯,佢係技術官僚,佢有好多限制,但佢係當時接納包括我在內一眾Consultant嘅意見,係反高鐵劍拔弩張果陣,同青年人對話。當時未必有成果,但都係果句,西鄉隆盛、坂本龍馬同勝海舟之間嘅關係,都唔係立即為日本打開局面,但喺江戶無血開城,救咗一百幾萬江戶民眾,就已經夠晒喇。今日有咁多薯粉,唔係石頭爆出嚟,唔係買返嚟,唔係因為對政改局面失望突然變出嚟, 曾俊華 為官咁耐有佢嘅基礎,你估學社民連呢班友,除咗斷章取義,就乜都唔識。我唔算係薯粉,但公道說話,係要講嘅。

點解我對林鄭月娥印象差,其實關鍵唔喺天星皇后,而係佢做咗政務司司長後,有次政務司司長請咗大棚評論界活躍人士上佢官邸食飯,我呢啲亞斯伯格症唔識時務人士,乘機建議學紐約咁搞地標保護法,如果有地標保護法,唔好講紅樓,皇都戲院一類項目,地產商都唔會輕易郁手。而紐約地標保護法,都係因賓夕凡尼亞火車站嘅保育事件搞出大頭佛至訂立。但我講地標保護法果陣,林鄭月娥會同你講,呢個有ABCDEFG咁多問題,唔一定啱香港。咁呀,你覺得邊個同想同你林鄭月娥connect咁,點解搞到咁多人唔想同佢connect,政見都未必係問題,聽意見嘅態度至係問題。

所以撕裂2.0係點搞出嚟,其實都係做人態度問題。撇除政治複雜嘢唔講,如果北京要考慮搵一個可以廣泛唔同階層接受嘅人,以林鄭月娥嘅脾性,只會搞到民眾同佢totally disconnect,跟住乜都唔知亂咁決策,結果搞出一鑊泡出嚟。 曾俊華 呢方面嘅風險,會比林鄭月娥細好多。

發表迴響

你的電子郵件位址並不會被公開。 必要欄位標記為 *