李登輝-min

泛民邊個有 李登輝 嘅智慧

泛民,無論熱普城同左膠,都有一班無事袖手談心性,臨危一死報君王嘅柒頭,對搞民主必須嘅妥協呀,dirty work一無所知。我諗 李登輝 喺台灣民主化嘅經驗,對大家都係有啟迪意義。

李登輝 令台灣商界願意擁抱民主

台灣民主化,蔣經國有重大功勞唔駛講,佢嘅貢獻同西班牙國王主動結束佛洛哥嘅專政一樣。但台灣情況係,都要有人肯令商人玩民主呢個遊戲,而玩得放心。 李登輝 由於受日本教育影響,其實好事嚟, 李登輝 成日講船中八策,其實佢對幕末歷史係瞭如指掌。幕末薩摩藩同長州藩,都可以透過利益交換,而不計前嫌,締結同盟,咁學德川家康咁死忍難忍喺國民黨,再hack咗國民黨同中華民國憲政個OS,再暗扶民進黨,呢啲扭坤大挪移玩法,你叫傳統華人一定玩唔到,但 李登輝 當台灣係幕末咁玩,就玩得十分之好,雖然大家都話台灣民主有啲缺陷,但 李登輝 嘅成就其實仲大過維新志士,雖然江戶係無血開城,但啲利益擺唔平,終於都打咗三次仗,圍會津,滅蝦夷共和國,之後武士起兵引發西南戰爭,而 李登輝 ,可以令台灣喺最少嘅流血情況下,過渡到政黨輪替,如果 李登輝 吓吓都只係講原則,台灣到今日都唔會民主化,更加唔好講2016年嘅第一次國會政黨輪替。

當然曾俊華唔可能好似 李登輝 咁叻,但如果商界肯團結,泛民300票,加20張新民黨抵抗票,以及自由黨嘅抵抗票,再加商界暗投曾俊華,唔係完全唔會贏,因為真係投暗票,呢個商界同泛民嘅合作平台,依家開展,好過突然有類似辛亥革命嘅事件,然後急就章合作,我可以咁講,最後一定會惹出類似袁世凱呢啲人,跟住成件事就膠晒。日本薩長同盟之前,甚至江戶無血開城之前,幕府開明派(勝海舟)、一大堆維新志士,薩摩藩同長州藩之間,全部係互有淵源,有一定合作同信任基礎。正如 李登輝 ,佢本省籍加日本教育,藍綠通殺,至有可能開台灣嘅局面。

後話:故意揀呢張,因為cosplay江田島平八,得 李登輝 可以得其真髓,日本都無幾個人有 李登輝 果種霸氣。呢個世界,有啲漫畫人物係好難cosplay,而江田島平八,肯定係其中一個,我諗得 李登輝 有呢股震懾力。

發表迴響

你的電子郵件位址並不會被公開。 必要欄位標記為 *