曾俊華-造勢

曾俊華 愛丁堡廣場造勢大會料製造歷史

如果班自決派,或土共唔知乜叫民意,唔接地氣,我建議呢班人,睇清楚 曾俊華 直播佢地巴士巡遊每一站。 曾俊華 喺太古坊出現,場面真係賓虛咁嘅場面嚟形容,太古坊返工果班中產,都係好典型嘅香港中產,藍黃絲都會有,呢個就係民意。

曾俊華 愛丁堡廣場造勢大會料盛況空前

依家只不過中午食lunch嘅巴士巡場,本來海怡半島都已經搞到好墟冚,當然記者多亦都有關。但太古坊呢個盛況,我係睇live都覺得佢勁誇張,一般政府官員出行係警察多過平民,但 曾俊華 嘅情況完全唔同,係平民包實 曾俊華 ,我相信記者都插唔入去,更加唔好講差佬,對上一次出現呢種情況,已經係英國管治時期,彭定康勳爵擔任總督果陣嘅事,亦即所謂肥彭旋風果陣。你可以睇到 曾俊華 嘅民望有幾高。

以我推算太古坊嘅情況,我相信全港各地,今日會有好多人放工後,自發去 曾俊華 嘅造勢大會,向北京以至一眾選委表達明確意向,就係香港人希望 曾俊華 做特首,而唔係林鄭月娥(雖然胡國興都係好唔錯嘅人選嚟,但奈何佢係老咗,佢未必有足夠體能應付特首繁重嘅工作,如果政府延聘胡官擔任特別顧問,我認為係十分適合,特別執番正啲法律,香港近年啲條例草案draft屎咁,呢個係法律界人士叫苦連天嘅事嚟,相信胡官會幫到好多,但呢個後話)。我相信,北京都密切留意呢次造勢大會嘅舉行,畢竟群眾基礎呢家嘢,係要走上街至會見真章,對共產黨嚟講,如果你無群眾基礎,你係連談判資格都唔會有,因為群眾基礎正正就係你嘅實力嚟。

由於我預計愛丁堡廣場會有好多人聚集,所以我呼籲各位打算去撐薯片嘅人,千祈咪揸車,否則中環真係塞到黐線都唔得掂,本來禮拜五中環已經塞到爆廠,更加唔好講搵停車位,呢樣係幾乎係mission impossible嚟,而今日就更加係,因為我唔認為警方會為大批支持 曾俊華 嘅民眾,作出特別嘅人群管制措施,畢竟香港人參與政客嘅助選活動,竟然出現賓虛式嘅場面,我相信呢次係香港歷史上近年罕見嘅,泛民啲明星政客都唔具備呢個實力。

發表迴響

你的電子郵件位址並不會被公開。 必要欄位標記為 *