羅冠聰-min

羅冠聰 明唔明點解佢自己被人鬧爆嘅原因

羅冠聰 喺facebook,長篇大論講點解佢堅持要投白票,結果被人插到唔只開花咁簡單,七孔流血就差唔多。 羅冠聰 同自決派,應該仲未明點解,支持泛民嘅人,會咁樣鬧到佢地飛起。

羅冠聰 完全唔明白群眾諗乜

呢次支持曾俊華嘅光譜其實好廣,唔計主流泛民,相對激進嘅,都有唔少支持曾俊華。原因唔係曾俊華靚仔,或者曾俊華係民主鬥士。對我呢啲戰略人嚟講,支持曾俊華都係戰略因素。 羅冠聰 呢班友唔明係,依家呢場選舉,公眾實際關注係一場點嘅戰爭。

其實群眾係好心水清,立法會權力有限,比例代表制下放土共入去,亦未必會造成大災難(雖然都搞到關公好忙),但特首係另一回事,依家嘅憲制下,特首權力極大,所以特首選舉唔係俾你班自決派顯示自己有幾清高嘅場合,特首選舉嘅邏輯一定係要lesser evil,因為你戰略上失誤俾個最evil嘅入去,就真係全民hihi,而且香港市民累積嘅龐大財政儲備,就會變成一眾仆街自肥嘅金庫,甚至係攞嚟對付人民,群眾並唔係傻嘅。

羅冠聰 或自決派或者覺得,我係立法會議員,可以阻止到特首亂嚟,你肯定你有呢個能力,以依家憲制情況下,最慳水慳力嘅做法,就係換屆選舉選個lesser evil,甚至票源好大程度上嚟自泛民同溫和商界嘅人做特首,日後泛民好多嘢容易同政府討價還價,畢竟呢位特首上台唔係全靠北京,而係有泛民嘅實質支持,呢啲政治債係要還嘅。呢個咁簡單嘅戰略原理, 羅冠聰 同你班自決派諗唔明。劉小麗同梁國雄點解搞成咁,我知點解,我亦無意說服他們,有啲人明捧曾暗捧林,有人識睇嘅。但 羅冠聰 你唔係呢類有機心嘅人,如果咁都睇唔清個戰略形勢,呢個係蠢到加零一。對群眾嚟講,固然容忍唔到自私自利嘅政客,但愚蠢政客一樣係群眾難以容忍。點解大家識玩雷動計劃,無錯泛民政客係蠢,但泛民支持者一啲都唔蠢,只不過大家都唔想犧牲時間參與政治,因為喺議會燒時間真係浪費人生浪費光陰。

羅冠聰 仲年輕,我希望佢少喺啲術語迷陣裡面迷失,認真睇清楚依家嘅戰略形勢同群眾諗法,再作決定。

發表迴響

你的電子郵件位址並不會被公開。 必要欄位標記為 *