林鄭月娥-周永新-min

林鄭月娥 搵周永新教授老襯

林鄭月娥 民望低處未見低,要急急搵人背書,連周永新呢啲做官果陣得罪過都搵,周永新教授諗住退休做好人,希望藉拍片機會去搏 林鄭月娥 支持佢嘅主張,點知 林鄭月娥 擺明搵周授教老襯,搞到周教授急急要劃清界線,周教授無撤回支持同意書,都已經好厚道。

邊個仲會信 林鄭月娥 ?

周永新教授呢啲老好人學者,唔知 林鄭月娥 呢挺人,一向都係表面對你好,暗中插你兩三刀果隻,所以至會上當,被迫同 林鄭月娥 同行。關注保育果啲人,一般好少上當,因為file最花果部分,正係保育果部,依家天星皇后兩個碼頭重現人間無期,連紅樓都爭啲被人拆,你就知 林鄭月娥 由發展局局長升咗做政務司司長,喺保育政策上都係零進步,正常人都唔會認為, 林鄭月娥 做咗特首之後,會真係堅搞全民退保,雖然我個人係唔贊成喺香港擁有自主人口同入境政策前,搞乜嘢全民退保,呢啲表面上幫老人家嘅政策,只會被中國移民係咁搵漏洞濫用,香港年青人會怨死政府同周教授一世。我諗周教授某程度上,低估咗近得共官太多嘅港官,可以變成咗乜嘢出嚟。

當然, 林鄭月娥 搵周永新老襯,完全達唔到提升民望嘅目標,對於年青人,除咗果啲不食人間煙火,長期住喺堅離地城嘅左膠,絕大部分都唔會支持搵自己老襯嘅全民退保,依家提全民退保係倒米行為。而呢次同周永新搞到咁核突,本身亦係關公災難嚟,又一次證明咗, 林鄭月娥 完全無辦法管理好公關隊伍。喺政治上,公關嘅重要性係確保傳達俾市民嘅政治信息唔會錯,或者一啲高度令人反感嘅政策,可以用軟性手段爭取市民嘅支持,或減少反對力量。但依家 林鄭月娥 嘅團隊,日日撲滅啲關公災難都已經好唔得閒,唔好話花心思令到一個政治信息容易明白,令公眾反對聲浪減少呢啲對 林鄭月娥 公關團隊嚟講,係過於深奧嘅事。

如果 林鄭月娥 當選嘅話,佢個團隊應該集體拜一拜關公,但唔係因為警察同黑社會拜關公果個理由,而係成日搞出關公災難,打搞關公,成隊Team要向關公道歉,如果關公知道自己成日被現代香港人提起嘅原因,係因為啲膠人自膠,一定會笑到傻。

發表迴響

你的電子郵件位址並不會被公開。 必要欄位標記為 *