亞投行-min

香港入 亞投行 做水魚

陳茂波做財政司司長有乜問題,唔駛睇幾個月後點,睇今日點都死。 亞投行 宣布接納香港做會員,而香港要繳交十二億港元嘅實繳股本,喺交咗呢筆股本後,香港就正式係 亞投行 會員。

做 亞投行 會員無著數

照計入中國主導 亞投行 呢單嘢,居然批咗,香港啲傳媒應該會大鑼大鼓,但依家出奇地低調,十分之奇怪。之前好多人都以為 亞投行 係好嘢嚟,因為2014年 亞投行 創立果陣,啲人睇到中國經濟強勢,加上所謂嘅一帶一路戰略,果陣係香港想做創始會員都唔得,同台灣一齊都唔獲批。但依家係香港都批,雖然啲錢好少。好明顯,因為中國經濟形勢急轉直下,搞得唔好,所謂 亞投行 唔係借錢俾啲亞洲第三世界國家,而係中國政府嘅吸水機器,大佬,秘書處喺北京,中國有嘅投票權成26%,中國有水果陣,咁梗係中國擴張外交嘅工具,所謂要同美國主導嘅國際貨幣基金會抗衡。但依家中國唔支爆都偷笑嘅情況下,香港入 亞投行 有乜著數,分分鐘成堆歐洲國家(特別英國,保守黨咁勇簡直係白痴)都後悔自己中伏嘅時候,香港依家入 亞投行 ,會唔會最終變咗水魚,呢點我真係十分之懷疑。

亦由於呢件事,可能令香港變成水魚,所以3月16日立法會嘅委員會會議無人提,今日政府發咗新聞公報,都好似得一兩個傳媒提吓,隨時諗住側側膊過咗財委會算數,咁樣都幾hihi。作為一個負責任嘅香港人,應該問政府,依家入 亞投行 ,會為香港帶嚟乜實質好處,同埋呢啲好處,會唔會當中涉及相當大嘅風險,呢啲風險又係唔係香港孭得起,依家十二億實繳股本,其實好少錢,依家香港啲大白象工程,閒閒地都幾百億港紙計,五年俾十二億真係好濕碎,每年兩億幾,真係股票印花稅都大把有剩。但係香港人對加入 亞投行 嘅條款所知唔多,加上大家都知中國經濟係乜狀況。如果唔係咁有著數,而 亞投行 嘅治理又係中國人主導嘅情況下,我認為不如好似美國、日本嘅態度,就係觀望唔好入住,反正都無大著數。特別要注意,香港有六十幾億待繳股本,正常唔駛俾,未試過有世界銀行一類機構搞到要交待繳股本,只不過,大家都知中國乜都會發生。

發表迴響

你的電子郵件位址並不會被公開。 必要欄位標記為 *