習近平-特首-min

習近平 一錘定音特首自由競爭

今日香港《都市日報》報導, 習近平 已經一錘定音,就係特首選舉應該係自由競爭,無欽點邊個,所謂嘅不任命論,純屬選舉技倆。呢個講法,同我最近四十八小時內,綜合各個互無關連而可靠嘅消息來源嘅料相脗合,呢個好大機會,就係 習近平 嘅意思。

習近平 睇清你班友嘅真面目

自由競爭係表面果句嘢,不任命論係選舉技倆,果句至係實嘅。熟悉中國政治都知,任何人假傳聖旨,都係要被人捉去坐洗頭艇。所以,依家咁嘅情況,我睇遲吓西環有人被人好似肖建華咁捉咗上洗頭艇洗頭,然後再做圖書管理員,我真係覺得無乜嘢唔出奇。

但對啲土共選委嚟講,呢次自由競爭,簡直係政治考驗。無錯,呢次投票係暗票,但民主300+大部分都投票俾曾俊華,另加應該有100張商界抵抗票,離當選門檻大概200票左右。林鄭月娥嘅得票,會反映呢班土共選委究竟係邊一邊嘅人,要估係估到,林鄭月娥嘅得票將會係十九大前後中國對港系統換人嘅指標,如果依家江系人馬仍然企得好硬淨,我諗依家班土共都會被清理得好乾淨,基本上,林鄭月娥當選係唔係對班土共咁著數,好睇佢地對十九大嘅大執位點落注,佢地唔係賭緊香港選舉,仲要賭埋中國共產黨內部嘅人事,我真係好懷疑香港班擦鞋仔,有幾多個可以睇清楚呢個亂過亂世佳人嘅局勢。

不過有一點可以肯定,林鄭月娥上台後,社會肯定會維持大撕裂嘅格局,當大撕裂搞出大頭佛果陣,亦好難將責任推到泛民身上,因為泛民同溫和建制派已經有咗好清楚嘅共識,就係搵曾俊華上台,仲要曾俊華係民望最高,除咗香港研究協會擺明車馬造假嘅民調,其他係按正常社會科學常規嚟做抽樣嘅民調,都係曾俊華民望最高,同港大Popvote嘅投票結果類近。係你班土共自己堅持聽唔知邊個講支持林鄭月娥果陣,其實大家都知,如果北京要追究邊個搞出個大頭佛果陣,要搵邊啲人落鑊,畢竟呢班友幾十年嚟食共產黨嘅,但玩到共產黨謝,正常嚟講,如果唔係中共一定搵唔到好嘅代理人,呢班友根本係生存唔到,唔好話佔上政壇重要位置。所以果啲親共選委,自己諗清楚。

發表迴響

你的電子郵件位址並不會被公開。 必要欄位標記為 *