國會恐襲-min

國會恐襲 : 對英國宣戰

喺3月22日,我國國會遭到恐襲,包括喺國會地區持刀向途人襲擊,以及用車撞向人群。 國會恐襲 導致一名警員以及一名途人死亡。

國會恐襲 等同對英國宣戰

喺一個以國會無上論作為憲政基礎嘅國家,依家凶徒喺國會外嘅橋進行襲擊,呢個係對英國宣戰無異,大家都記得,防衛英國內部安全嘅軍情五處,徽號係有國會嘅徵號,而並非只有皇冠,呢個喺英國政府機構嚟講比較罕見,但亦都清楚說明咗MI5嘅成立目標,就係保衛以國會為核心嘅民主君主立憲政體。所以,呢次 國會恐襲 ,無錯,無用炸彈,而刀手亦好快遭到持槍警員擊斃(英國警員唔似香港,個個都持槍),但呢個襲擊地點,仍然係對英國宣戰咁解,而發動呢次襲擊嘅恐怖分子,同策動911襲擊嘅拉登一樣,佢地好清楚呢次 國會恐襲 背後嘅意義,以及想傳達嘅信息,我只能講,呢班恐怖分子十分之膽大妄為,而且視英國嘅民主憲政傳統如無物。

照現時傳媒影到嘅疑凶照片,好明顯又係極端回教徒所為,可以同內政大臣訪問巴基斯坦有關。雖然好多英國公民係回教徒(包括唔少國會議員,以及倫敦市長),但可以咁講,如果回教恐怖分子仍然唔停止自己嘅所作所為,以為自己打緊聖戰,錯誤了解聖戰就可以無惡不作嘅話,未來修改Immigration Act果陣,要對部分回教國家國民收緊入境限制,收緊審批歸化成為英國公民嘅標準,幾乎係無可避免,因為大家並玩唔起呢類恐怖襲擊。

我相信,英國朝野應該對出兵打柒DAESH有共識,伊斯蘭國係必須要消滅,呢啲信教信到short咗嘅友仔,一定係要鏟除。但唔理英國又好,美國又好,除咗鏟除DAESH,有一個國家嘅皇室,係應該早日鏟除,果個係沙地阿拉伯,無沙地阿拉伯嘅支持,果啲回教極端組織同埋思想,係唔可能繼續咁樣傳揚落去,遺禍人間。西方世界唔能夠因為石油供應,以及沙地阿拉伯皇室同政府表面上,仍然係西方反恐陣營嘅一員,而對沙地阿拉伯部分資助恐怖分子同極端分子嘅作為袖手旁觀。呢個國家一直以為有錢,可以拒絕世俗化同民主化,仲要四處搞事,我覺得已經膠夠,係時候認真傾吓沙地阿拉伯嘅前途。

發表迴響

你的電子郵件位址並不會被公開。 必要欄位標記為 *