林鄭月娥-嚴迅奇-min

林鄭月娥 被廉署立案:呢粒係核彈?

今年一月,毛孟靜議員(九龍西選區,香港本土)向廉署舉報 林鄭月娥 ,依家廉政公署回覆,會對 林鄭月娥 喺西九故宮設計上,直接委任嚴迅奇一事作出調查,成為咁多位特首候選人之中,唯一肯定有案被廉署調查當中嘅候選人。

林鄭月娥 有案在身,北京敢用佢?

當然,喺香港無罪推定嘅法律原則之下, 林鄭月娥 依家都係清白無罪,廉署可唔可以搵到證據作出滿意檢控,呢個係言之尚早。只不過,廉署亦唔係乜嘢案都查,雖然廉署係鼓勵大家有少少蛛絲馬跡就要報案,正如前廉署調查主任林卓廷(新界東選區,民主黨)所講,貪污案係好隱密,市民唔係專業人士,有少少跡象就要將file掟俾廉署,咁樣至會查到嘢。但廉署要立案,多少手上嘅嘢,反映單案係可以被追查,至會通知舉報人已經立案。換言之,如果 林鄭月娥 做嘅嘢,唔係踩咗公職人員行為失當果條界,廉署亦唔會無喇喇開file查佢,仲要喺選舉投票日之前去查。

其實曾蔭權因公職人員行為失當被成為第一位入獄嘅特首,呢件事已經令北京夠瘀,因為英國過往嘅總督,至少戰後呢一大批總督都好清廉,唔同葡國,唔少澳督有貪污紀錄好唔同。但曾蔭權上任之前,佢都係無嘢嘅,係唔知邊條茂利教壞曾蔭權,仲識埋黃楚標,至搞到依家咁嘅啫。但如果 林鄭月娥 已經有案在身,仲要委任佢嘅話,北京就真係要冒好大政治風險,如果一旦呢位行政長官任內干預廉署運作,或者廉署拘捕佢,搞到香港政局大亂,咁北京就要承受政治後果,畢竟依家北京對香港特首嘅人選有好大嘅話事權。所以, 林鄭月娥 喺呢個時候被廉署立案,仲要通埋天,呢件事係好詭異,隨時係核彈嚟。

依家習近平唔對香港特首人選出聲,但唔代表佢唔會出聲,如果張曉明唔係搞到件事太膠,習近平大把嘢要處理,都唔得閒理香港,但如果張曉明會搞到北京丟架嘅事發生,習近平作為黨同國家領導人,佢就無乜可能唔出聲。依家好睇中聯辦同土共醒唔醒水,作出合符各方利益嘅決定,但如果呢兩班友唔醒水嘅話,搞出一鑊泡出嚟,睇嚟香港水域將會有好多洗頭艇頻頻出動。

發表迴響

你的電子郵件位址並不會被公開。 必要欄位標記為 *