李嘉誠-曾俊華-min

李嘉誠 叫大家抗共呀,傻佬!

李嘉誠 果然係一個潮洲讀書人子弟,佢引女媧補天嘅傳說,喺表達佢支持邊個特首候選人。女媧係女性,膚淺而唔知中國古典文學嘅香港人,梗係以為一直 李嘉誠 係支持林鄭月娥。係嘅話,就枉 李嘉誠 作為一個中學中文老師子弟嘅大名喇。我簡單獻醜,講女媧補天嘅故事。

李嘉誠 講緊邊個係共工氏

女媧補天其中一個版本,嚟自《路史》:

太昊氏衰,共工為始作亂,振滔洪水,以禍天下,隳天綱、絕地紀、覆中冀,人不堪命。於是女皇氏役其神力,以與共工氏較。滅共工氏而遷之。然後四極正,冀州寧,地平天成,萬民復生。媧氏乃立,號曰『女皇氏』。

用當代香港語文譯,太昊氏衰弱後,共工開始搞亂檔,搞洪水為禍蒼生,於是女媧用其神力,同共工氏一較高下,滅咗共工氏而遷移人民,之後回復安寧,媧氏乃立,叫女皇氏。

《三皇本紀》裡面,都係講到共工氏頭撞西方世界支柱不周山,闖下大禍,要煉石補天

當其末年也,諸侯有共工氏,任智刑以強霸而不王,以水乘木,乃與祝融戰,不勝而怒。乃頭觸不周山崩,天柱折,地維𡙇。女媧乃鍊五色石以補天,斷鼇足以立四極,聚蘆灰以止滔水,以濟冀州。於是地平天成,不改舊物。

女媧係潮洲、台灣一帶祭祀嘅神靈,一定要用呢個文化理解,至明白 李嘉誠 講乜,如果張曉明,應該唔會明,無喇喇邊個同你背《路史》同《三皇本紀》出嚟。但如果你知女媧與共工氏一戰,修補裂痕。而不周山,係西方嘅支柱,其實呢個典故好清楚,代入香港係,有土共搞亂香港,頭撞香港嘅西方文化支柱,搞到雞犬不寧,所以有人要修補呢個裂痕,令大地回復安寧。

李嘉誠 用現代語文講果啲,都係攞嚟安撫中聯辦班文革後一點古典中國文化修養都無嘅友仔,謎面女媧補天,你睇埋後面嘅中國古典神話典故,你就明其實佢嘅真正意思,其實佢講好簡單:傻佬,係時候抗共令香港回復平靜,做嘢喇。 李嘉誠 要講,其實係咁,但當然唔可以明講,因為明講張曉明實發癲,相反,依家用女媧,一如好多膚淺人所講,我都係撐林鄭月娥啫,無嘢呀。依家西環班友,邊有咁好修養至得。大家要記住,香港咁多有錢佬中,其實 李嘉誠 係最有墨水,讀書最多果個嚟。

發表迴響

你的電子郵件位址並不會被公開。 必要欄位標記為 *