沙中線-min

沙中線 超支藉口令人感到奇怪

港鐵以 沙中線 香港公園、金鐘站同何文田站嘅土質工程不如預期為理由,所以向立法會要求追加撥款。我唔係工程師,我唔知 香港公園、金鐘站同何文田站嘅土質可以有幾多變,但如果係呢三個站嘅建造工程緣故而要追加撥款,我係感到不合常理。

沙中線 超支理由需要更多解釋

沙中線 呢三個聲稱土質不如預期嘅地點,其實都係啱啱完成另一啲工程無幾耐,何文田站啱啱完成觀塘線延線工程,香港公園係南港島線抽風口,金鐘站都係南港島線完成無耐, 沙中線 月台喺南港島線月台嘅樓上,呢個係好多人都知。既然係咁嘅話,其實港鐵應該好清楚果度啲土質發生乜事,呢個亦係南港島線、觀塘線延線以及 沙中線 幾乎係同一時間興建嘅理由。

但喺立法會文件上,呢一段亦係好令人驚訝

雖然港鐵公司於設計階段乃根據土力工程處編撰的岩土指南進行土質勘探,而鑽孔勘探的總數亦符合指南的建議,然而在施工時發現,實際的岩石特質與土質勘探所得的地質資料不同。岩石的實際平均天然節理間距為 1 米,比預期的半米增加約一倍,因而令挖掘的效率大幅下降。

究竟土力工程處嘅岩土指南係點編出嚟,點解土力工程處編份咁嘅嘢,啲承建商照跟,會玩到超支收場,呢件事有無人去認真探究過,真係聽落都匪夷所思,如果土力工程處編寫岩土指南方法係有問題,可能導致大量公私營工程嘅成本核算會出問題嘅話,咁係唔係申訴專員或者審計署應該介入,確保公私營嘅建築公司,遵照土力工程處嘅岩土指南行事,喺成本預算上唔會出現一啲極唔合理嘅重大偏差,我唔係建築工程呢行,但一般照住本指南嚟做嘢,如果堅係做足嘅話,應該係雖不中亦不遠,而唔係係咁超支,跟住又要立法會追加撥款,會上有議員質疑啲建築公司係咪先落標,後加價,唔係完全無原因,因為按道理,如果承建商照足一切行內最佳方法去做,跟住之前嘅工程又有一啲土力資料可以跟進嘅話,照理唔會依家至發現土質問題,最後搞到係要立法會額外加錢,呢一切一切,都係奇奇怪怪,相當之不可思議,令人摸不著頭腦。我呢個鐵膠,期待高人指點。

發表迴響

你的電子郵件位址並不會被公開。 必要欄位標記為 *