曾俊華-宣傳片-min

曾俊華 嘅宣傳片與政府新聞處嘅水平

以往政府嘅宣傳片,自彭定康走後,係一年比一年低,近年梁振英政府啲新聞片,簡直係垃圾級數。只不過, 曾俊華 呢次選戰啲宣傳片,好多眼前一亮,而 曾俊華 為反擊林鄭月娥而出嘅解釋財金政策宣傳片,喺解釋0-1-1措施部分,解說之清楚,簡直係近年罕見。如果政府新聞處啲片,有 曾俊華 啲選戰宣傳片咁簡潔有力,你班泛民真係死得。問題係,點解梁振英政府治下,啲宣傳片都可以咁垃圾。

曾俊華 可以擺脫梁粉制肘做番自己

曾俊華 嘅宣傳片拍得好,一方面係因為可以擺脫新聞處好多官僚制肘,呢樣好重要,因為新聞處有好多傳統思想框框,令好多嘢唔敢創新,而依家選戰,拳拳到死,仲框死自己就輪到自己死,所以可以突破。但另一方面,我睇邊個管新聞統籌專員都有一定關係。

近年港府嘅新聞統籌專員叫馮煒光,馮煒光同一眾土共啲宣傳有幾難,其實你日日睇講人港地啲嘢就明,除咗俾梁振英同一眾梁粉變態佬自我陶醉之外,根本係一無是處,特別一係扮潮,成日濫用KO呢個字,除咗反映佢地係心理變態,我睇唔到其他嘢,一係不斷重覆黨八股,要睇黨八股,文匯大公都夠難頂喇,仲睇你政府新聞處咩。所以,依家政府新聞處縱使有好多專業人士,但都係空有一身好武功,無法發揮效用,我識唔少新聞主任都做到抑鬰咁滯。政府新聞處有時有啲高登反斗行為,暗中玩你個政府,其實都係因為新聞主任職系都多人都頂梁粉唔順,政府喺Digital marketing上輸清光,其實同班拒絕與時並進兼不受歡迎嘅梁粉有密切關係。

呢次 曾俊華 呢套宣傳片,不單為日後新聞主任造成好大壓力,因為如果拍唔到呢個效果,呢班新聞主任會被上司鬧死,如果 曾俊華 上台還好,如果係林鄭月娥上台,我估班新聞官真係被摔到死都似,可以準備交辭職信。就算係泛民,日後拍宣傳片,都要好似呢套咁簡單易明,唔係成日都係滿口意識形態優先嘅口號,或者一啲娘到無朋友嘅graphic同畫面,呢方面,何秀蘭同一眾左膠嘅表現尤其惡劣,涉及美感嘅嘢,唔該你班左膠唔掂好過掂,呢方面,我絕對係好「法西斯」。

發表迴響

你的電子郵件位址並不會被公開。 必要欄位標記為 *