候任特首辦-min

候任特首辦 點解唔可以用番政府嘅地方?

雖然星期日至產生特首,但政府真係未出發,先興奮,公布晒 候任特首辦 嘅秘書長人選,同埋辦公室選址。呢個選址真係夠豪,喺以前叫花旗銀行大廈嘅冠君大廈辦公。地點,係一流。只不過,由公帑運用,同政府運作順暢度嘅角度,呢個選址好差。

候任特首辦 擺喺律政中心唔得咩?

候任特首辦 最好嘅位置,當然喺添馬艦政府總部裡面,因為確保文件交接等方面嘅順暢度,要開會都容易啲,因為 候任特首辦 唔係只喺同特首辦對口,好多現任問責官員,都可能需要同 候任特首辦 交接。如果添馬艦政府總部無位,其實應該用番政府嘅地方,一旦停止運作就將資源交俾政府部門,盡量節省資源同環保。其實律政中心雖然西座裝修緊,但中座同東座,其實搵人裝修都應該可以暫時用住三個月,我唔明點解唔用律政中心,而係另外租冠君大廈。律政中心係前政府總部,本身喺基建同保安上,一定滿足到政府嘅要求,相反,冠君大廈係好奇怪,雖然冠君大廈曾經係立法會同埋部分政府部門辦公室,但唔係機密程度要求高嘅 候任特首辦 嘛。

候任特首辦 要咁鬼多budget,其實我唔明當中因由,但由依家三位特首候選人選擇嘅辦公室嚟睇,林鄭月娥係特別豪,用會展中心辦公大樓做競選總部,同胡國興以及曾俊華相對寒酸嘅做法唔同。係咪因為有人嘅口味特別豪,當初申請 候任特首辦 嘅預算果陣,就係預林鄭月娥做候任特首,咁有人一向都係堅離地,咁梗係連選擇嘅地方都零舍又貴又離地,但香港市民啲公帑,又用埋喺一啲完全唔應該用嘅地方啫。

由 候任特首辦 嘅位置,我對所謂嘅理財新哲學係好憂慮,你話香港政府一貫孤寒都好,但有啲地方,真係唔駛用到咁豪,好似政府部門辦公室咁,政府本來就唔駛乜嘢門面,租辦公室應該係越簡單實用越好,甚至最好用番政府自己嘅辦公室,甚至用灣仔三座政府大樓啲空置辦公室,都好過喺冠君大廈租三個月,之後又唔知攞嚟做乜,完全係奇奇怪怪。甚至 候任特首辦公室 駛唔駛好大都係一個問題,因為無論邊位當選,都會好熟悉政府內部運作,如果理財新哲學係代表港人嘅錢係俾某啲人亂揮霍,香港人真係唔會想交稅俾呢班敗家仔。

發表迴響

你的電子郵件位址並不會被公開。 必要欄位標記為 *