丁葉燕薇-min

搵 丁葉燕薇 管候任行政長官辦公室? 林鄭月娥贏梗架

政府宣布候任行政長官辦公室成立,由 丁葉燕薇 去管,呢個 丁葉燕薇 去管候任行政長官辦公室,係所有對官場有少少認識嘅人都嘩然,梁振英同林鄭月娥集團,真係一啲交接政權嘅意思都無。

丁葉燕薇 係林鄭月娥馬房嘅人

點解本來一直以嚟,香港郵政都唔搞政治審查,但 丁葉燕薇 一做郵政署長,選舉寄嘢俾人審到喊,啲郵件收費越嚟越貴,搞到香港郵政競爭力同蔣任宏果陣爭好遠(蔣任宏係搶錢,但至少佢係識商業經營,佢做私隱專員期間亦無令人失望),因為 丁葉燕薇 唔單只個樣似林鄭月娥,但直頭係林鄭月娥啲親信嚟,都係一樣官場無人緣,事事都有Control freak果啲人,所以至搞到做咗六年郵政署長都無調過,仲要2011年做郵政署長,但2014年至正式升為首長級(甲級)政務官,大家可以諗吓 丁葉燕薇 嘅工作能力,究竟發生緊乜事,點解政府內部一直都唔想升呢條友做高位。

依家選舉結果都未出,就升 丁葉燕薇做候任行政長官辦公室主任,一係,中聯辦以為林鄭月娥贏梗,如果習近平再唔出手制止鬧劇,3月26日林鄭月娥喺 丁葉燕薇 協助下將會提早接管政府,屆時乜嘢膠事都會發生。就算曾俊華贏, 丁葉燕薇 都可以阻住曾俊華交接政權,我有理由相信,有唔少檔案可能會神秘消失於地球度,而果啲檔案係乜嘢檔案嚟,相信大家都會心照。

由 丁葉燕薇 嘅候任特首辦秘書長任命,大家都知之前盛傳 丁葉燕薇 會入主特首辦,或者做問責官員嘅傳聞真確性極高,而呢個 丁葉燕薇 ,正係較早前被傳會引發政務官大逃亡嘅原因嚟。我相信好多政務官睇見呢份新聞公報,真係心都寒,好多都應該會打定辭職信,或者學楊立門咁申請提早退休,因為呢個政府將會由一班牛鬼蛇神當道,日後留番喺度係乜嘢政務官嚟,我真係十分之無眼睇。睇嚟楊立門離開政府,專心發佢嘅歌星夢,得閒開吓慈善演唱會係十分之正確嘅決定,因為呢個政府將會由一班黐線而不顧後果嘅人當政,無理由幫呢啲友仔執行政策,然後再幫佢地做代罪羔羊咁蠢架。張曉明要立心毀滅香港,呢樣嘢已經十分之清楚。

發表迴響

你的電子郵件位址並不會被公開。 必要欄位標記為 *