popvote-結果-min

Popvote 結果反映嘅民意:林鄭月娥點做呀

Popvote 雖然投票率強差人意,只不過,有六萬幾張飛,都有一定代表性。而投票結果極之一面倒,九成人支持曾俊華,曾俊華嘅支持淨值係 87%,林鄭月娥嘅支持淨值係 -94% ,完全係破紀錄。

Popvote 反映香港市民極反感林鄭月娥

由於今年 Popvote 保安上太膠,所以 Popvote 投票率奇低可以理解,應該係最 die hard 泛民嘅人去投,但都好難想像出現極一面倒支持曾俊華現象,甚至去到係極反林鄭月娥嘅地步。或者我咁講,曾俊華係唔係人氣咁勁,呢個仲可以探究,但啲人好反感林鄭月娥,呢個就幾乎可以肯定。換言之,林鄭月娥一上台,已經要面對成班極度唔妥佢嘅人,其實呢個係十分棘手嘅一件事嚟。

如果依家北京真係任由中聯辦硬扶林鄭月娥上台,呢個真係會將香港嘅局勢推向港獨,因為啲人好憎佢。當然,中年以上果啲可以選擇移民嘅,但年青一代,好多一如我所講,班友連BNO都無,又唔甘心俾你林鄭月娥管,呢啲困獸鬥係最得人驚,而依家 Popvote 嘅民意,正正話俾大家聽,如果真係曾俊華落選,香港就會積累極大嘅怨念,呢股怨念會引導香港去乜嘢方向,我都唔知,我亦唔識控制呢股怨念。甚至唔好叫我控制呢股力量,因為呢股力量係無法係駕馭嘅,一如觸發法國大革命果股能量,大家諗吓法國爆發大革命後,呢股力量爆咗幾多年至得?理論上,喺戴高樂將軍建立第五共和之後,法國大革命所爆發嘅怨念能量至叫到爆發完畢,法國走向一個相對穩定嘅狀態。所以由董建華、梁振英加林鄭月娥,可以累積幾大股負能量,而呢股負能量可以爆幾耐,我真係識條鐵。

如果 Popvote 出咁嘅數據,張曉明仲話林鄭月娥有民意支持,呢個係叫指鹿為馬,香港人唔係傻嘅,咁玩法一定會出大事。依家睇習近平喺未來六日,有無決心停止呢種局勢,如果咁搞去嘅話都無人做嘢嘅話,如果你要保住你一家大細安全去申請移民,我個人唔會反對,因為傻嘅都知成個核彈擺咗喺度,你覺得唔會爆鋪勁?我真係無乜興趣喺呢方面同大家賭一鋪。

發表迴響

你的電子郵件位址並不會被公開。 必要欄位標記為 *