勝海舟-min

需要 勝海舟 嘅年代

通常喺重大選戰將到決戰時刻果陣,我都會成日講日本幕末歷史,由上次豬狼之爭到lesser evil論戰,我講咗好多次薩長同盟,而喺依家,天誅同人斬遲早一街都係嘅年代,我想講一個拯救江戶民眾嘅「建制派人物」,呢位老哥,就係日本歷史上最叻吹水唔抹嘴,但只係一項江戶無血開城就夠佢威足一世嘅幕末名臣 勝海舟 。無 勝海舟 ,就無今日嘅東京,而明治維新,亦需要用遠比戊辰戰爭血腥得多嘅代價去達成。今日呢個因應3月19日選委選舉論壇而改期嘅星期日休息,想討論一下係 勝海舟 呢位幕末名臣。

勝海舟 何以取信維新志士

勝海舟 係明治維新史嘅奇人,佢係舊幕臣,但佢得到一眾維新志士嘅高度信任,所以至可能傾得出對德川慶喜嚟講極為優厚嘅講和條件,德川慶喜擁有晉見明治天皇嘅特權,而勝海舟亦可以輸送資源開拓橫濱港,以及靜岡茶種植業,德川家舊幕臣嘅生計得到解決(反而西南諸藩武士生計問題解決唔掂,搞出西南戰爭,呢個後話),但係 勝海舟 同維新志士嘅信任唔係石頭爆出嚟,甚至坂本龍馬原本想殺佢,點知聽 勝海舟 講佢啲見聞( 勝海舟 吹牛能力日本歷史第一,呢個係公認),連坂本龍馬都信服佢,做埋佢學生。西鄉隆盛有乜改革建議, 勝海舟 會聽入耳,並付諸實行,所以德川慶喜最成功嘅決定,就係搵 勝海舟 代表佢講和。

德川幕府之後一路得到善終,甚至德川家嘅後人,到今日仍然喺日本好活躍,同大清帝國皇室、袁世凱等等消失人世人嘅視線好唔同,一方面維新派都唔係馮玉祥一類走數X,但另一方面, 勝海舟 作為新舊政府嘅橋樑,佢避免江戶甚至日本一場死傷慘重嘅血光之災。 勝海舟 可以講係德川家嘅保護神,大家諗吓,德川家康當年係點對豐臣秀吉一家,係抄家滅族,細路都唔放過,大家睇《沈默》呢套片,德川家點對付天主教徒,都係大人細路無一倖免,你就知呢個家族真係滿手鮮血,今日德川一家仍存於世,如果唔係遇上 勝海舟 ,恐怕一早係重覆當年佢地家族滅過嘅人嘅下場。

趙紫陽喺1989年未能做到 勝海舟 嘅角色,除咗鄧小平嘅愚昧之外,趙紫陽喺1989年同北京學生之間嘅信任係好唔夠,基本上,由1989年4月15日胡耀邦死到5月20日趙紫陽親赴廣場,得一個月時間點建立信任,你話點可能得到任何決定性嘅合作。2003年田北俊令《基本法》23條立法失敗,係有啲運氣,當然,今日田北俊同民主派間嘅關係,同埋依家佢變得相對開明,佢有可能係其中一個 勝海舟 ,只不過,喺呢個風雲變幻嘅時勢,真正有可能做到 勝海舟 嘅工作,其實係曾俊華。

其實曾俊華嘅團隊,以我認知真係乜人都有,由土共到民主派都有,呢個有啲似當年嘅神戶海軍操練所,佢肯聽年青人意見,所以年青人亦肯服佢,追隨佢,其實你睇羅永聰就明。好多民主派中人,喺唔同方面,都曾經同佢有交集,有交手過,或者礙於當時時勢所限,未能合作,但至少大家會交流到意見,甚至離開政府後,就已經用晒佢聽過嘅人嘅主張,呢個正係點解,個個都係建制候選人,但曾俊華可以取信於民主派,甚至唔少年青人,呢啲唔只親和力問題,仲有心胸開放嘅問題。喺一個轉折嘅時代,要雙方傷亡最少,甚至共同獲益,要嘅就係呢種人去折衷新舊勢力。

而且呢種人要有理想,點解北京同樣無血開城,大清帝國交出政權後,中華民國成立頭幾十年都係軍閥混戰中度過,袁世凱係無理想,只係想發皇帝夢嘅人,對中國會變成點,佢真係WFC。但 勝海舟 係最早嘅泛亞主義者,佢提出要對抗西方,必須係日本帝國、大清帝國同朝鮮王國聯合,喺東西方對抗嘅角度, 勝海舟 係正確。所以有時睇契丹人係咁咬日本人,同埋日本人右翼分子係咁發擴張夢,我真係覺得好好笑,作為西方人,一定會奸笑三聲,大家睇過 勝海舟嘅主張,就明點解我會奸笑。 勝海舟 正係基於呢種考量,佢入明治政府都係只做rubber stamp,同袁世凱坐咗上去就想稱帝咁膠,完全係兩回事。

依家香港將會進入轉折時刻,一個取信於各方,而唔會心術不正嘅人係好重要,香港會係當年江戶一樣無血開城,定係因各方嘅爭奪變成黎巴嫩式嘅廢墟,呢個在乎千幾名選委一念之間。可惜時下嘅人讀書太少,甚之可惜。

(呢篇文嘅配圖,係NHK大河劇《 勝海舟 》嘅opening嚟)

發表迴響

你的電子郵件位址並不會被公開。 必要欄位標記為 *