田北俊-1-min

田北俊 有無諗過點解自由黨咁無用?

田北俊 出席民主黨黨慶之後,貼咗張大合照,跟住佢問點解民主黨新一代可以接到班﹐又有腰骨。 田北俊 終於蛻變成一個政治人,佢明白腰骨嘅重要,問題係,自由黨咁耐以嚟吸收嘅黨員,係唔係一班有腰骨嘅友仔,定有腰骨嘅新一代,全部睇唔過眼,要含淚留喺泛民?

田北俊 應該苦心教吓商家佬從政之道

我唔係話泛民係聖人,只不過,喺中共打壓下,入得泛民嘅人,其實多少係要有腰骨,否則會一早變節,甚至可以咁講,有唔少泛民中人,係有理想去犧牲自己嘅,好似民主黨新界東立法會議員林卓廷,我讀大學果陣,佢係師兄嚟,佢本來係喺廉政公署有安穩生活。好似南區利東區議員區諾軒,嚴格嚟講,以佢屋企背景,應該係入咗自由黨,而唔係民主黨。講句難聽,要搵快錢,發大達,入民賤聯就得,駛鬼入民主派政黨咩。

點解自由黨搞出一大堆無腰骨嘅人,甚至好似廿蚊張呢啲仆街,因為佢地當政治係一盤生意,而且唔係做Startup咁,一步步去建立自己嘅事業,而係搵快錢嘅投機生意,所以邊個係大佬跟邊個,你點會想一班靠投機為生嘅人有腰骨?其實泛民都有唔少做生意嘅人,好似IT界泛民成班選委,好多都係做自己生意,問題係,IT界做生意,無得玩投機,無付出技術同努力,唔該你早抖。所以可能最接近 田北俊 果個有腰骨要求果個,就係政見上越嚟越偏泛民嘅王維基,因為王維基盤生意係自己打返嚟嘅江山,而唔係靠投機嚟搵銀。

自由黨要生存,唔好再靠中聯辦之外,最好係吸引一班願意由低做起嘅人,簡單嚟講,係當搞政治好似創業咁做嘅人,如果吸引嘅,都係一班諗住黐中共金糠發達嘅無用人士,以及一班投機分子,自由黨永遠都只會吸引到李梓敬呢種質素嘅二世祖,而唔係依家民主黨第二代果種質素嘅人。甚至我可以咁講,某程度上,依家你話乳鴿捱得,可能本土派陣營果班友更捱得,鄺葆賢、陳澤滔、黃任匡唔駛講,甚至黃台仰、梁天琦、游蕙禎過到呢段時間低潮,都會係好好打,商界最強果啲,都係果啲低潮大蕭條都捱得過果啲人啫。自由黨繼續吸引啲二世祖同投機分子入黨, 田北俊 一世都唔會搵到接班人。

發表迴響

你的電子郵件位址並不會被公開。 必要欄位標記為 *