林約希-min

英國護照係旅遊證件? 點解 林約希 代表英國出戰奧數

林鄭月娥喺接受訪問果陣,一直都話英國護照只不過係旅遊證件。呢種當國籍如食生菜嘅態度,呢度一直都反對。只不過,大家認真睇林鄭月娥嘅細仔 林約希 ,係代表英國出戰2011, 2012年兩屆國際數學奧林匹克果陣。林鄭月娥呢個論調,根本係自相矛盾。

林約希 代表英國出戰數學奧林匹克

根據國際數學奧林匹克嘅紀錄,林鄭月娥嘅細仔 林約希 (Josh Lam) 分別2011, 2012年,代表聯合王國披戰袍,參加國際數學奧林匹克,2011年攞係Honourable Mention,係聯合王國代表隊六名代表中排名最後,2012年大有改善,喺聯合王國代表隊六人組中排行第二。好彩2011年同2012年香港唔係主辦國,否則情況將會極度尷尬。

但問題始終嚟,如果林鄭月娥咁認為英國護照係旅遊證件,點解 林約希 唔係代表香港出戰,甚至唔係代表中國出戰,而係代表英國出戰。代表得英國,仲要係喺英國全國選拔賽贏出至代表英國喎,即係 林約希 係一如香港幾百萬因唔同法律而攞到BC或BNO嘅英籍人士一樣,都係貨真價實嘅英國人,而英國護照更加唔係乜嘢旅遊證件,而係一個堅過石堅嘅國籍身份。林鄭月娥呢種言論,如果我係中國領導人,都會對呢個人嘅忠誠有所懷疑。點解《行政長官選舉條例》,嚴禁任何有外國居留權嘅人被提名,如果特首係代表中央政府主權,呢個人可以將國家忠誠視作兒戲,你覺得呢條友會堅係愛國愛港?我個人真係會俾個超級大問號。

某程度,曾俊華係比林鄭月娥更合愛國愛港原則,曾俊華呢啲真係移民咗海外,再因自己對家鄉認同而回流,甚至退出辛苦攞返嚟美籍嘅人,佢係屬於歸僑,一如我啲祖宗都係咁樣,所以我至會搞到喺香港出世。呢啲歸僑,一向係視為真愛國,係反右、文革呢啲仆街事件,至令海外華人徹底失望,不做歸僑(所以我憎共產黨,但又熟悉中共黨史就係呢個家庭背景),所以曾俊華呢種人,其實係屬於絕咗種嘅愛國愛港人士。相反,林鄭月娥係因為怕咗共產黨,1990經British Nationality (Hong Kong) Act 1990攞英國公民身份,你覺得呢條友對中國忠誠有幾多咁,其實唔難睇到。

發表迴響

你的電子郵件位址並不會被公開。 必要欄位標記為 *