的士罷駛-1-min

的士罷駛 ? 定奉旨喺中環泊車一個朝早?

今朝,啲的士車主發動「 的士罷駛 」,只不過,呢場所謂 的士罷駛 ,真心真係笑咗,如果你覺得當年戴耀廷教授宣布「佔領中環,正式啟動」叫好笑,咁呢班的士車主搞嘅所謂 的士罷駛,應該去到攞每月之星嘅級數,因為成件事都好膠吓。

搵人出錢 的士罷駛 唔該俾多啲錢

成日有句爛gag,示威嘅要義就係要威,如果唔威就示乜嘢威。所以, 的士罷駛 梗係要有足夠嘅車出嚟玩,但大家睇吓呢次的士車主出手之孤寒,就明點解呢次所謂 的士罷駛 ,只係引嚟一班平日都雪藏泊喺度唔揸嘅的士,揸出嚟龍和道舊天星碼頭附近求其泊車,變成硬膠大會。

的士罷駛-1-min
的士罷駛-1-min

五舊水,你班的士車主無嘢嘛,首先,呢班的士車主賺咁多,應該出手豪爽啲,至少,成個示威價係咁計嘅

  1. 唔該寫明免車租,如果要車租嚟示威,大佬,豈不是示完威仲要倒貼你班車主?朋友,你無病嘛。
  2. 油錢邊個俾先?如果寫明,出嚟行免費送一缸油,仲免車租揸埋下午,我係司機都會考慮額外收五舊水揸出嚟,依家連油錢邊個出都無講,你玩咩。
  3. 五舊水?大佬,求其喺金鐘港鐵站截啲人上半山,再做番長途旗,揸多幾轉都分分鐘多過五舊水。為咗五舊水,喺龍和道食西北風,如果我係的士車主,堅係想玩鋪勁,點解唔出舊等於一更嘅收入千二銀?咁樣可能成千架車都可以call到出嚟嘅。

依家大家就明,點解香港啲的士服務可以垃圾到呢個地步,呢班友炒牌已經賺到肚滿腸肥,跟住又孤寒,唔肯投資喺架車上面唔在講(否則點會成街豐田comfort),係連投資喺示威保住自己嘅cartel都要慳,錢又要賺,又唔肯落本,我係的士司機都睬你都傻,所以今朝早肯揸出嚟果啲司機,隨時係車主自己啲員工,同埋少部分自己做埋車主嘅司機,有幾多個真的士司機,我真係好鬼懷疑。如果我要投資咁多錢嚟租你班友個牌,如果Uber一類可以進一步合法化,點解唔揸Uber先?呢個問題係非常之清楚明白。依家所謂嘅專營的士計劃已經係好膠,只不過,如果我係政府見到班的士車主,又孤寒又膠,又無叫座力,我諗我都會第一個郁佢地立威攞分。

發表迴響

你的電子郵件位址並不會被公開。 必要欄位標記為 *