曾俊華-造勢大會-min

曾俊華 應該考慮搞一場造勢大會

有一單選戰新聞,好多人走漏眼,但我覺得好值得注意,至少唔少薯粉同薯仔都留意到,就係 曾俊華 喺3月16日喺西九龍中心搞嘅小型造勢大會,當中嘅支持度,其實可以比得上唔少明星。甚至泛民嘅造勢大會,都未必有 曾俊華 呢個威勢。

其實我個人睇法係, 曾俊華 應該搞一場造勢晚會,去展現佢嘅親和力,以及同北京講,選擇 曾俊華 至係一個港中兩地雙贏嘅選擇。

曾俊華 係唯一有群眾力量嘅建制人士

中共一直以嚟,應該對一個政治現實好頭痛,就係北京推出嚟嘅人馬,無一個有真正嘅群眾緣,次次都要花費大筆維穩費「買」群眾,我相信中聯辦都應該從中賺咗唔少錢,至於賺咗幾多,就留番王岐山搵強力部門用洗頭艇捉張曉明返去慢慢查,香港人唔會反對用洗頭艇捉張曉明,大可以放心。

如果依家 曾俊華 喺添馬公園搞場大型造勢晚會,北京可以睇到一樣嘢,呢啲民意未來就可以化為支持特區政府嘅力量,咁樣北京可以專心喺十九大同契丹經濟問題上大火拼。反之,如果北京逆民意而行,呢股支持特區政府嘅潛在力量,就會變成一股相當強大嘅反對力量,屆時真係果句爛gag,你唔同 曾俊華 deal,咁之後你班友自己同黃之鋒、游蕙禎慢慢deal,如果你係共產黨,會揀 曾俊華 ,定係日後要同難搞好多嘅反對力量deal,呢個係不言而喻。

其實由理性搏弈嘅層面,大家都知道邊個係最佳人選,問題係,我相信習近平又好,北京嘅有識之士又好,需要民調以外嘅實證,去證明依家中聯辦明顯係點條黑路俾香港同北京行,而最能夠證明有人為咗自己啲黑錢,亂咁老點北京同香港嘅最佳辦法,就係舉行一場大型造勢晚會,等全香港嘅薯粉同薯仔可以現身,表示到佢地嘅支持。而林鄭月娥一定無辦法搞,因為中聯辦一定好似班蠢的士車主咁用whatsapp俾錢call馬,而call馬搞出嚟嘅大筆選舉經費,足以令林鄭月娥被DQ,大家都知中聯辦嘅執行方式,已經膠到無可再膠嘅地步。所以 曾俊華 敢踏出造勢大會呢一步,佢就會係最後贏家,甚至話俾北京聽,搞真普選都唔駛怕,因為佢有呢個民意氣勢支持。

發表迴響

你的電子郵件位址並不會被公開。 必要欄位標記為 *