羅永聰-min

羅永聰 親自上陣話俾大家聽乜事

林鄭月娥公開稱讚曾俊華幕僚之一 羅永聰 之後(其實想挖走佢),不單無影響曾俊華嘅士氣,反而曾俊華打蛇隨棍上,就由 羅永聰 親自拍一段拍住上嘅片,應該係香港選舉史上,第一次有幕僚赤膊上陣去拉票,而且得到公眾廣泛支持。 羅永聰 ,呢次真係改寫歷史,大家先睇以下片段先

其實由 羅永聰 講嘅真心說話,可以睇到呢次曾俊華團隊嘅使命,同埋點解 羅永聰 呢啲人,會寧願效忠曾俊華團隊到底,都唔會理你呢個林鄭月娥。

羅永聰 係真心去支持曾俊華嘅理念

呢個世界,好多團隊係買唔到,特別喺政治同傳媒,有時候,理念同目標係更重要。林鄭月娥其實出嚟選有乜目標,你睇林鄭月娥喺西九故宮件事上果種不擇手段,你只係可以肯定,林鄭月娥係為權而戰,但攞住啲權做乜?我都想知。

而 羅永聰 又好,曾俊華又好,其實係嘗試尋找第三條道路,突破依家香港困局嘅第三條道路,如果呢條道路成功嘅話,香港唔單只可以休養生息,而避免香港走向愛爾蘭化嘅泥沼裡面,但如果失敗嘅話,其實我2014年喺《蘋果日報》都講過,香港會變成愛爾蘭嘅翻版,呢件事大家知道後果可以有幾嚴重。曾俊華係匯集咗一班有共同理念嘅人去工作,犧牲自己去奮鬥,所以林鄭月娥以為乜都可以買,但事實上,好似 羅永聰 咁嘅政治人才,係無可能買返嚟,如果無政治理念,只係一班投機分子嘅大雜燴,你用錢買返嚟嘅友仔買到乜出嚟,林鄭月娥自己應該心底有數。

羅永聰 親自上陣,正正係話俾大家聽,曾俊華唔只係一個人,而係一隊人,而且係一隊有共同理念嘅人。依家林鄭月娥要回應嘅問題係,你諗住搵乜人嚟管治香港,連張秀麗,楊立門呢啲人都頂唔順果陣,會有乜人會嚟管治香港?好似梁振英時期咁,請埋馮煒光、劉江華、吳克儉、袁國強呢啲有權用到盡嘅人渣治港,香港人已經受到夠,至少香港人希望,係有一隊有理想,有心為香港人嘅人,去有耐心咁樣收拾過去五年留低嘅爛攤子,誠如 羅永聰 所講,唔係幾年內可以見效,畢竟香港呢個官僚機器都有成百幾年歷史,但至少係應該有心做嘢先。

人,正係林鄭月娥最大嘅弱點,而且應該短時間解決唔到。

發表迴響

你的電子郵件位址並不會被公開。 必要欄位標記為 *