特首選舉電視辯論-總結-min

特首選舉電視辯論 總結

特首選舉電視辯論 終於舉行,雖然無爆料,以花生度嚟講,仍然唔及2012年唐英年自殺式炸彈襲擊同梁振英大攬炒。只不過, 特首選舉電視辯論 始終係舉行咗,依家都係一個總結嘅時候。

特首選舉電視辯論 總結

首先,胡國興嘅問題,就係唔熟書,同埋體力嚴重不足,對普羅市民嚟講,體力不足可能仲嚴重過唔熟書,唔熟書可以搵人,但做做吓搞出大病,如果無士啤軚人選,咁係絕對唔掂嘅。所以基本上,胡國興大家幾鍾意佢都好,都係要退出戰場,簡單嚟講,太老從政,一從政就打場硬仗,根本應付唔到。特朗普嘅體能一流,呢個係無庸置疑,可惜胡官唔係特朗普。

林鄭月娥嘅問題係,佢太多自殺位,多到對手可以喺facebook度抽佢水,電視以外嘅戰爭就繼續被人打落去,最典型係大讚羅永聰果段,但完全唔記得咗,林鄭月娥係有位做過一年嘅前政助張高麗,點解羅永聰可以忠心耿耿可以共同進退,但佢自己完全無官員會共同進退,甚至有一隊得到廣泛讚譽嘅隊伍。呢個再反映出,林鄭月娥喺處理團隊嘅人和上相當失敗,其實曾俊華陣營反應唔夠快,只及時喺facebook上抽水,如果係即場喺電視上,指出林鄭月娥係完全唔識管理團隊人事,點可能團結香港人,我可以講,林鄭月娥係可以「即時死亡」。我未見過一個不斷喺球場製造防守漏洞俾人射波嘅友仔,我只能講,如果曾俊華唔係保守踢法,你遇上葉劉淑儀嘅進取踢法,或者遇正余若薇呢隻人,真係可以被對手狂數幾十粒,死咗都唔知乜事。

你話曾俊華係唔係踢得特別好,佢係有士哥,但踢法過份保守,一個防守漏洞多到恆河沙數嘅對手,想狂數就狂數,駛鬼客氣咩。只不過,曾俊華嘅保守踢法,亦令林鄭月娥要突圍都唔容易,即係最悶果隻踢法。反正曾俊華真正主場喺場外,facebook上面,曾俊華快速出post甚至抽水嘅打法,同埋聽取場外評述組織攻勢嘅玩法,呢個係曾俊華嘅團隊優勢。

最後,今日嘅honourable mention係葉劉淑儀,佢嘅場外評述係相當好,如果葉劉淑儀落場,隨時殺傷力最強就係佢,統監府唔係俾落場,都唔係無原因。佢出場,林鄭月娥隨時真係喺場上被大屠殺。

One thought on “特首選舉電視辯論 總結

發表迴響

你的電子郵件位址並不會被公開。 必要欄位標記為 *