特首選舉電視辯論-第三段

特首選舉電視辯論:第三段簡評

特首選舉電視辯論 第三段,本來係打民生議題,但結果變晒打政治議題,成為咗政治議題延長戰。都係果句,沒有民主,豈有民生, 特首選舉電視辯論 第三段好明顯。

特首選舉電視辯論 第三段變晒政治亂戰

本來應該呢一節係應該睇民生政策,但由於香港民生同政治根本糾纏,完全係一舊飯,所以林鄭月娥盡力想扯番嚟佢熟悉嘅社會福利政策,都完全徒勞無功,甚至令自己再度喺政治議題上中招,我唔明一個咁牙尖咀俐嘅人,點解會係咁俾對方射入龍門,呢啲乜嘢黐線辯論手法嚟。

  1. 胡國興呢場仗最大問題係體力不繼,一場辯論需要極大專注力,而呢個係超出胡國興嘅應付範圍。我相信,睇完呢節 特首選舉電視辯論 ,大家好有理由唔支持胡國興,因為體能唔掂,體能唔掂乜都假。特朗普係老,但特朗普嘅體力係keep得住,一個經常出現喺世界摔角大聯盟做嘉賓嘅友仔,就係呢方面。
  2. 林鄭月娥本來想走出政治泥沼戰,但最後林鄭月娥仍然走唔出佢嘅A字膊特色,特別喺丁屋政策問題,又將責任推晒俾曾俊華,因為發展局局長係跟財政司司長。仆街,發展局局長叫劏房波,呢條仆街係直接report俾梁振英嘅,你覺得發展局做嘢受曾俊華控制,大佬,A字膊唔係咁啩,呢種無承擔嘅表現,正正係公眾最為反感。
  3. 曾俊華提出嘅問題,係呢半個鐘唯一有士哥,林鄭月娥確實係有頭威無尾陣嘅專家,一開始果陣係威係勢,之後就完全不了了之,丁屋僭建問題如此,政制問題又係如此。如果佢覺得佢做政改三人組期間嘅政策無問題,點解林鄭月娥唔喺佢當選後重啟政改,呢啲問題十分之明顯。

其實第三節都係一場亂戰,而且都係悶戰,只不過,林鄭月娥無法擺脫政治泥沼戰情況下,依家打政治戰,其實係曾俊華略佔優勢,所以,呢場勉強你要我選個MVP嘅話,都仍然係曾俊華,只不過,都係果句,唔係曾俊華打得靚,而係其餘果兩個對手令人失望,完全唔知自己打乜叉。都係果句,呢場仗係各方人馬鬥犯錯犯得少,好明顯,曾俊華犯錯最少,穩守突擊就可能有士哥,不過結果就係一場悶波囉。

發表迴響

你的電子郵件位址並不會被公開。 必要欄位標記為 *