特首選舉電視辯論-第二段

特首選舉電視辯論 :次半小時評

特首選舉電視辯論 第二節,主要集中喺經濟問題,呢個係胡國興同林鄭月娥嘅弱項,點解我話係胡國興同林鄭月娥嘅弱項,我可以咁分析。

特首選舉電視辯論 經濟悶戰,一街都唔熟書

  1. 胡國興喺經濟問題係嚴重唔熟書,唔熟書到乜程度,首先,喺fintech,fintech唔只喺保安咁簡單,因為依家最hit嘅fintech,已經係more than p2p payment,依家其實最熱門談論,係類似bitcoin咁樣,係blockchain(中文譯區塊鏈)技術,因為blockchain會對支付以至成個商業運作流程,有革命性影響,但好明顯胡國興自己唔熟書。一開始cross examination流程,簡宜係如在夢中,瞓著咗一樣,大佬,電視辯論嚟㗎,咁都得,空門任人入咩,真係會吐血。
  2. 林鄭月娥講起土地問題,表面好熟書,但實際上係提出唔符合公共利益政策,好似俾居屋住戶免補地價分租單位,朋友,你傻的嗎?補地價呢個問題,係因為居屋係受政府補助,如果受政府補助都可以咁搵銀,不如開放埋租者置其屋單位都攞晒去租算喇,簡直係沒有最黐線,只有更黐線。呢種唔係叫熟書,呢種係叫利益輸送,相信好多香港人都唔會贊成呢種古怪政策。
  3. 喺Basel III呢個問題,簡直反映林鄭月娥將佢做庫務局期間學嘅嘢做嘅嘢原裝還俾人,有任志剛幫佢補習有鬼用咩,如果任志剛真係幫佢補習補足嘅,無理由連Basel III係乜水都唔知呀,大佬。我作為一個略懂finance嘅人,我真係聽到把火。Basel III可以好影響依家銀行嘅營運,講乜叉金融業委員會,我真係想佢返去早抖。

雖然曾俊華呢半個鐘嘅表現,都只能用乏善可陳嚟評論,但呢半個鐘嘅悶戰裡面,一個超級唔熟書(簡單嚟講係無溫過書,空槍上陣,直接肥佬),一個就讀啲唔讀啲,其實都係唔多熟書, 特首選舉電視辯論第二節嘅大致評論係,呢半個鐘悶戰MVP係曾俊華,只不過係因為佢啲對手太垃圾,唔係佢特別比人勁。即係三個學生都低分,只不過佢合格,其他人唔合格甚至零蛋。

發表迴響

你的電子郵件位址並不會被公開。 必要欄位標記為 *