特首選舉電視辯論-min

特首選舉電視辯論 :決定性嘅一役

今晚香港時間八點到十點,全香港電視無膠劇睇,因為七台聯播 特首選舉電視辯論 ,呢場戰役,將會係極具決定性嘅一役,林鄭月娥能否喺低民望大局中突圍而出,全睇呢一役。

特首選舉電視辯論 cross examination 部分最關鍵

雖然教協禮拜日果場係第一場三雄會戰,但由於林鄭月娥拒絕接受交叉質詢(我用法庭用語 cross examination 形容),所以各路人馬未見真章。只不過,林鄭月娥未接受過 cross examination 都係咁講錯嘢,所以佢能否過到交叉質詢呢一關,我個人抱有好大嘅疑問。呢個亦可能係點解林鄭月娥喺禮拜日果一場,拒絕接受交叉質詢,以及有人要指派屈穎妍,老屈曾俊華唔肯接受交叉質詢嘅真正原因,交叉質詢,似係林鄭月娥嘅死門。

純粹睇牌面,有交叉質詢嘅情況,胡官係佔優勢,因為胡國興未做大法官之前,佢係御用大律師,做得御用大律師嘅話,佢嘅cross examination方面嘅功架唔會差,只不過,多年未用過,同埋能唔能夠將法庭上用嘅技巧,用喺政治上,呢個係關鍵,暫時可以將政治法庭任督二脈打通果個,仍然係李柱銘御用大律師,暫時未見有其他大狀,可以將法庭果套盤問技術,用喺議會同公開政治辯論上令對方口啞啞。所以,今晚好睇胡國興呢位政治素人嘅發揮,但如果胡國興用到呢套skill set,林鄭月娥招架唔住嘅機會係極大,因為大家都知大狀質人唔到人咁品,對方係一流大狀都未必頂得順,更何況完全未受過法律訓練嘅公務員。

另一個焦點,係今晚有無人喺交叉質詢環節爆大鑊,特別今早林鄭月已經受體院醜聞困擾,上次唐英年同梁振英大攬炒,將梁振英嘅管治基礎炸散果一役,正正係 特首選舉電視辯論 ,唐英年大爆梁振英出動防暴隊以及商台續牌嘅內幕,將梁振英管治基礎完全炸散,確立咗梁振英只能做五年嘅命運。今晚三個月人之中,有無人喺鏡頭前使用攬炒嘅大絕,呢個好受關注。當然,如果葉劉淑儀係入到閘,今晚本來可以預計葉劉淑儀一個炸彈人飛身炸爆林鄭月娥,可惜佢入唔到,今晚慳番唔少花生。

如果大家唔想益CCTVB,大家可以睇RTHK 31或者ViuTV,或者有線電視嘅廣播或網上訊號,雖然場地由CCTVB提供。

發表迴響

你的電子郵件位址並不會被公開。 必要欄位標記為 *