蘇獨公投-min

蘇獨公投 再起,蘇格蘭再臨十字路口

BREXIT 無法剎車之際,蘇格蘭民族黨再出招, 蘇獨公投 可能再起,蘇格蘭民族黨已經向蘇格蘭國會提出再啟動 蘇獨公投 ,如果蘇格蘭國會同意嘅話,就會同聯合王國國會提出呢項要求,相信聯合王國國會,好難反對再搞 蘇獨公投 。

蘇獨公投 緣於走數

呢次 蘇獨公投 再次啟動,某程度上係因為蘇格蘭民族黨可以忍耐,睇到英國BREXIt派果種不負責任同過於心急,唔理當年第一次 蘇獨公投 嘅承諾,明知蘇格蘭同北愛爾蘭喺英國留歐嘅前提下唔獨立,仍然堅持玩脫歐公投,終於玩出個大頭佛,而聯合王國國會喺無X用嘅工黨支持下,仍然堅持硬闖《里斯本條例》第50條,咁樣玩法,其實係俾足晒藉口俾蘇格蘭啟動 蘇獨公投 ,再加上連北愛議會選舉,都因BREXIT問題,令共和派成為最大議會派系,對於蘇格蘭民族黨嚟講,依家幾乎係啟動 蘇獨公投 最佳時機,可以咁講,依家BREXIT談判變咗螳螂捕蟬,黃雀在後,聯合王國唔只要面對歐盟,而且仲要面對蘇格蘭呢個新國家。

蘇格蘭再臨十字路口, 蘇獨公投 會唔會成功,好視乎英國喺BREXIT談判成點,如果照依家倫敦依然係no plan就諗住亂嚟嘅玩法,我恐怕呢次 蘇獨公投 統派會大敗而回,因為除咗英格蘭班友未出發先興奮外,依家蘇格蘭同北愛爾蘭,甚至倫敦本身,都深受BREXIT搞出嚟嘅不明朗前途困擾,咁樣搞落去,好多蘇格蘭人會投票支持蘇獨都唔出奇。尤其工黨同自由民主黨嘅支持者,自由民主黨支持者親歐係唔駛講,阻止英國脫離無望下可以點做大家心照,至於工黨,呢個黨咁俾個首相恥笑法,其實依家未搞到滅黨,上帝已經好厚待工黨班左膠,如果我係蘇格蘭工黨嘅支持者,寧願蘇獨之後,Scottish Labour反而可以浴火重生,依家真係寧願獨立都好過被個膠黨魁凌遲處死。

雖然政治一日都嫌長,但如果首相Theresa May堅持hard BREXIT嘅話, 蘇獨公投 再起之日,好大機會就係蘇格蘭真正邁向獨立之日。所以全世界最關注 蘇獨公投 嘅城市,包括咗全世界最多蘇格蘭巴士買家嘅香港,有解。

3 thoughts on “蘇獨公投 再起,蘇格蘭再臨十字路口

  1. 脫英為咗留歐? 咁就粒糖賺唔到, 家當敗清光都似.

    EU 單一市場? “市場” 只係一個詞.

    賣啲乜呢? 會計財經金融法律服務? 科技工程? 呢啲 England 做至掛. 當然羊毛產品係靚, 威士忌確係威, 北海石油計埋入去好唔好? 以上呢啲如果單靠 EU單一市場, 咁蘇格蘭人就食都唔知夠唔夠食, 唔好講話過啲豐裕啲嘅生活. 想食大茶飯就要放眼世界, 之但係, 家陣就係留歐做唔到呀嘛, UK 要脫歐原因 “之一” 都係咁啫.

    一個成功嘅人, 係要有志氣, 與此同理, 國家, 都係一樣, 歐盟睇唔起英國, 眾所皆知, 歐盟又點會睇得起獨立後嘅 Scotland? 百份之一千無可能, 當 Scotland 臭四呢, 就一定會. 即係咁……
    EU: “拿! 收咗呢堆仆街流氓佢, 咪呀之呀咗 …… 挑! 係你自己話要留歐架, 講你就照做啦X你個老味!”

    大英帝國雖已成過去, 但王朝仍在, UK 仍在, 蘇格蘭人, 整體來講, 係有志氣嘅, 點睇都唔可能淪落到咁下賤嘅地步. 即係咁, 自己有名門望族後人個身分, 係無以前咁有錢啫, 都有錢過好多人, 衣食無缺, 有目標有尊嚴, 咁都要離家出走? 重要走去啲唔放自己家族在眼內嘅有錢佬度, 求人收自己做𡃁? 唔X係呀!

    世澤兄:

    我經常有留意你嘅文章, 好多時都認同你嘅睇法, 但你明顯認為英國應該留歐, 而我, 認為應該脫歐. 脫唔脫得成, 我預測唔到, 但脫唔成英國死得我預測到.

    照計, 揸得 UK passport, 我同你都唔想見到英國衰架, 咁其實你係想分析脫歐成唔成事? 還是認為英國留歐會有前途而脫歐無? 由於係兩回事來, 我想聽多啲你呢方面, 尤其後者方面嘅分析同意見.

    1. 喂,家下係你英格蘭犯賤在先,以留歐為條件氹蘇格蘭留英。

      而家公認走數脫歐,仲好意思話蘇格蘭

      「咁就粒糖賺唔到, 家當敗清光都似」

      即管睇下點。我食定花生睇你脫歐之後點折墮。

      1. echykr 兄:

        如果淨睇牌面, 係架, 可以話 UK 走 Scotland 數, 但係 …. 脫歐留歐, 事關重大, 始終都要做個決定㗎, 咁選前明言許下承諾, 選後做足, 人都下台走埋, 兩樣都向全國找數, 又點計?

        脫歐之後點折墮? 係架, 如果唔發憤圖強的話, 咁個個國家都係咁架啦.

        瑞士有無入歐盟? 有無折墮?
        希臘有無入歐盟? 好風光啊可?

發表迴響

你的電子郵件位址並不會被公開。 必要欄位標記為 *