杜琪峰-min

杜琪峰 撐曾俊華反映嘅一股怨氣

今日最受網民關注其中一段特首選舉新聞,當推 杜琪峰 公開拍片支持曾俊華,而且成段片啲對白,句句有骨,有骨程度係咁多片裡面罕見,火力仲勁過田北俊果段好多。

杜琪峰 擺明車馬反梁振英2.0

好多導演撐曾俊華都唔奇怪,但 杜琪峰 最特別,因為佢拍其中一套經典作《黑社會》,英文片名就係election,明拍政治,實拍香港政治,所以杜琪峰係以一個完全明白呢次選舉本質嘅人嘅身份,去講佢點解要支持曾俊華,佢嘅支持係十分之特殊。

但更特殊嘅位在於, 杜琪峰 每一句都係充滿攻擊性,甚至明示暗示喺政治分析同警告

  1. 杜琪峰係擺明唔妥林鄭月娥,杜琪峰係明或暗指有人喺度擺官威,懶係高人一等,我諗 杜琪峰 應該受過唔少官僚怨氣,所以至會一出口就火力猛烈
  2. 杜琪峰 係極唔妥有人喺度搞分化,至於果條以搞分化為樂嘅茂利係乜水,大家都不言而喻。
  3. 佢用起承轉合嚟形容依家係2047年前嘅關鍵時間,其實係回應番自決派嘅課題,亦係對北京嘅明確警告,如果依家選錯特首,會對香港五十年不變承諾嘅實踐有重大嘅影響,所以 杜琪峰 唔只識拍戲,而且佢對政治係十分之心水清,好清楚依家係乜關鍵時勢。
  4. 杜琪峰 果句曾俊華佢喺心目中已經贏咗,更係十分之有骨,即係咁講,如果其他人贏咗,一般市民都會好似咁唔會服,後果將會係點,真係貴客自理。

所以 杜琪峰 呢番話,其實反映咗香港已經開始累積緊一股怨氣,如果北京明明有一個各方都接受嘅人唔揀,仲要揀一個撩事鬥非嘅人做落去,即係北京自己都撩事鬥非,咁樣管法係會出事。以往曾俊華嘅宣傳片,都唔會向大家傳達呢個訊息,最多話曾俊華有幾好,但由上次田北俊段片開始,已經有啲骨,而 杜琪峰 依家嘅講法,就直情係一段相當完整嘅政治分析,都係果句,香港要向上提升,定係要向下沉淪嘅抉擇,依家 杜琪峰 都講得好明吓,因為 杜琪峰 都唔係唔識政治嘅人,佢應該係娛樂圈裡面對政治睇得比較透徹果個之一。問題係,依家共產黨嘅人,睇唔睇清依家嘅危險形勢,一如我喺禮拜日《蘋果日報》論壇版嘅分析

發表迴響

你的電子郵件位址並不會被公開。 必要欄位標記為 *