戴健文-min

戴健文 得罪晒香港電台啲方丈

果次林鄭月娥寸香港電台唔掂,搞出關公災難,本來亂咁鬧傳媒機構,呢種行為已經係得罪方丈,呢個世界只有更惡嘅叫特朗普嘅方丈至玩得起。只不過,林鄭 月娥亂咁鬧人唔係無下文。因為林鄭月娥嘅競選辦主任,就係香港電台前副廣播處長 戴健文 ,依家好多前港台,都要 戴健文 出嚟解畫。關公災難見得多,關公災難搞到個關公本身被人追九十九條街, 戴健文 都算係開創先河。

戴健文 唔記得咗香港電台文化

雖然我只做過香港電台客席主持,同埋做咗香港電台個諮詢組織代表八年,但都知香港電台因為長期受土共打壓,以及對編輯自主嘅執著,所以香港電台果種文化係好團結,同埋香港電台就算離開咗香港電台都好,都好似自己個台為榮,甚至香港電台有乜風吹草動即刻出嚟幫拖。依家林鄭月娥近乎係對香港電台宣戰,所以香港電台我識果啲新知舊雨,都幾乎個個衝晒出嚟要求林鄭月娥交代。而做過副廣播處長嘅 戴健文 ,自己喺林鄭月娥身邊都唔提醒林鄭月娥,又唔同香港電台上上下下道歉,咁佢依家想知,老闆玩hit and run擦港台鞋唔駛找數負責,可以不顧而去?所以當香港電台啲元老級退休高層都要搵 戴健文 嚟追殺果陣,香港電台啲現職員工,唔可以明玩你林鄭月娥啫,可以暗玩你玩你傻,所以依家 戴健文 反而變咗林鄭月娥關公系統嘅負資產,因為對香港電台啲方丈嚟講,依家係清理二五仔,大家都知做二五仔下場會係點。

戴健文 會唔會自己出嚟道歉,或者代表林鄭月娥向香港電台道歉,呢層我都唔知,但以香港電台嚟講,可以寧願支持相對尊重言論自由嘅曾俊華,或者黃絲色彩重嘅胡國興,都唔會支持一個對香港電台嘅編採自主極有敵意,仲要攞中央電視台嚟踩香港電台嘅林鄭月娥,無論選戰角度,定維持選戰角度,得罪香港電台新知舊雨都唔係一件好明智嘅事。依家就睇 戴健文 點解決呢場關公災難,雖然我睇 戴健文 好大機會要自己私底下向每個香港電台嘅人解釋發生緊乜事,畢竟 戴健文 唔係只係做一單林鄭月娥嘅選舉㗎,江湖咁細,舊同事聚舊都搞到面面懵,咁就無謂喇。

發表迴響

你的電子郵件位址並不會被公開。 必要欄位標記為 *