林鄭月娥-白色恐怖-min

林鄭月娥亂用 白色恐怖 一字自己中伏

今日教協特首選舉論壇,一去到政治意識形態問題,林鄭月娥就被人狂攻,但最受重傷,係林鄭月娥自己唔熟政治,竟然話網民連蕭芳芳都鬧係 白色恐怖 ,結果俾曾俊華反過嚟暗指中聯辦針對《成報》嘅行為係 白色恐怖 ,呢個簡直係足球交錯波搞出防守漏洞,然後俾埋對家射入龍門嘅典型例子。

網上圍抽同 白色恐怖 係兩回事

其實林鄭月娥咁樣話網民 白色恐怖 ,啲五毛都應該多得林鄭月娥唔少,因為照林鄭月娥嘅邏輯,果啲喺網上圍抽黃之鋒、游蕙禎嘅五毛,全部都係搞緊 白色恐怖,香港政研會班契丹,更加係 白色恐怖 ,林鄭月娥真係一嘢成功將五毛定義為 白色恐怖 ,周融班友仲要咁撐林鄭月娥,真係情何以堪。

網上圍抽同 白色恐怖 係兩回事, 白色恐怖 係法國政治術語嚟,就係指政府果種無所不用其極,用暴力甚至謀殺異己嘅政治迫害,其實《成報》被人淋黑油嘅事,正正係典型嘅 白色恐怖 ,因為為咗令《成報》收口,竟然用上黑社會刑事恐嚇嘅手段,就係 白色恐怖 。蕭芳芳支持林鄭月娥,因而被網民鬧兩句,或者可以叫網絡欺凌(雖然我唔認為係欺凌),但同white terror係兩回事嚟。反而,有時五毛鬧黃之鋒、游蕙禎嘅言論,唔少去到刑事恐嚇嘅界線。當年陳巧文被退休警員威嚇要強姦佢嘅言論,已經係 白色恐怖 嘅一種,點解林鄭月娥又完全唔提。所以曾俊華快速抽水,暗指近排唔少事情係白色恐怖,呢種快速反擊能力,我估唔到曾俊華係有。至少曾俊華唔係平日喺立法會果種一碌木,如果唔係政府有咁多制肘,其實佢嘅戰場閱讀力同快速反擊能力係相當好,正正佢有呢種閱讀力同反擊力,林鄭月娥以為答非所問,兼且東拉西扯可以抽人水,點知一嘢被人KO番轉頭都唔知。

林鄭月娥嘅死症,其實正正係佢最自豪果句金句:官到無求膽自大果七隻字,果句係同張曉明果句太陽照常升起係相輝映,佢以為自己乜好醒,寸寸貢就可以出嚟橫行天下,但實情係,佢對政治好多嘢認知極少,仲衰過迷失於蠅頭小利間果陣嘅曾蔭權,所以日後嘅選舉辯論,林鄭月娥一定喺政治問題上係咁出醜,係咁輸分,熟書咁又點?

One thought on “林鄭月娥亂用 白色恐怖 一字自己中伏

發表迴響

你的電子郵件位址並不會被公開。 必要欄位標記為 *