林鄭月娥-教協辯論-min

林鄭月娥 嘅優勢喺邊度

正所謂知已知彼,百戰百勝,雖然平心而論,我係好憎 林鄭月娥 ,而 林鄭月娥 答政治相關問題,往往係垃圾到爆,好似答王凱峰關於白色恐怖嘅提問,垃圾程度直迫官到無求膽自大嘅爛gag,呢個我等陣至慢慢砌佢。只不過, 林鄭月娥 係唔係無優勢,又唔係。 林鄭月娥 果種喺公共行政嘅熟書,如果唔係 林鄭月娥 嘅性格,令佢係咁搞出關公災難出嚟,其實係有相當嘅優勢。

林鄭月娥 可以講出好具體嘅執行時間表

雖然牌面上,曾俊華係教育專家,仲要曾任職波士頓市政府教育局,只不過,曾俊華返到香港,未曾任職社福同教育職系,變咗有一個問題,就係成個實務執行同當中嘅問題,以及程序並唔熟悉,俗啲講就係唔熟書。反之, 林鄭月娥 係好熟每一個執行嘅步驟,佢嘅政綱係有好具體嘅實行時間表同執行計劃,呢個正正係佢曾經擔任社會福利署署長嘅優勢,對於一啲唔講意識形態嘅選民或市民,其實會覺得 林鄭月娥 並唔係咁差,至少佢講啲嘢,唔係純粹吹出嚟,或者幻想出嚟,而係堅係有料到嘅。喺present特首新政策撥款時間表果度,尤其反映到佢係熟書。

胡國興基本上,就無法彌補佢呢方面嘅缺陷,因為佢真係無公共行政經驗,而佢成隊team都無人有公共行政經驗,胡國興最大優勢,真係換咗吳克儉呢件barcode頭。反之,曾俊華係有公共行政經驗,但佢隊team要搵人幫佢喺具體實行方法果度補課,簡單嚟講,每一個政策item,有邊啲要改procedure,有邊啲可以喺現有嘅procedure之下執政到,但要點做,呢啲係要補習。始終 林鄭月娥 做過政務司司長,同埋做過啲好落地嘅部門,無錯, 林鄭月娥 個人本身離地,但佢對啲procedure唔離地,呢個唔係唔會吸引到市民。

當然, 林鄭月娥 繼續喺政治議題上亂嚟嘅話,其實佢幾熟書都無用,一去到政治或意識形態相關嘅課題, 林鄭月娥 就唔係果個政務官嘅 林鄭月娥 ,而係變咗中聯辦嘅 林鄭月娥 ,完全暴走,不受控制,講嘢沒有最過份,只有更過份。咁樣唔收自己把口同性格,係幾熟書其實都無補於事。

發表迴響

你的電子郵件位址並不會被公開。 必要欄位標記為 *