曹星如-拳王-min

星期日休息 曹星如 拳王 香港夢

曹星如 喺3月11日,擊敗日本籍蠅量級拳王向井寬史,攞齊三大拳擊組織金腰帶。我好少寫體育,但如果講要締造 香港夢 ,不畏任何國際挑戰嘅香港夢, 曹星如 廿一勝呢個世界拳王,話俾大家聽,香港人其實都可以,無嘢難倒香港人,只要賽制同裁判公平,大家純粹以意志、體力、技術等去較量,爭奪雙方交出嚟嘅金腰帶。

曹星如 與香港夢

喺美國,史泰龍嘅半自傳式成名作《洛奇》(Rocky),一直視為美國夢嘅代表,一個潦倒嘅二流拳手,靠不懈戰鬥意志,可以同一流嘅世界拳王打足十五回答,甚至《洛奇》系列電影,代表咗美國拳擊運動,以及背後嘅傳承精神(最神來之筆就係第七集,以外傳形式出現嘅Creed,呢種傳承為洛奇系列畫上完滿嘅句號。)拳擊,係足球以外另一種激發民眾意志嘅運動,足球或者都仲要用錢,或者舉國群眾嘅努力,去換取國際大賽嘅成就,為自己國家爭輝。但拳擊係一對一,你就算係一個 underdog boxer ,一樣可以憑力戰而得到群眾尊敬,《洛奇》嘅故事,本來就係受拳王阿里被二流拳手Joe Frazier纏鬥足十五回合嘅故事所啟發,而成為咗荷里活經典。對於香港呢類小國,拳擊運動對香港國民精神嘅振奮作用,就尤其重要。

所以 曹星如 廿一戰攞晒三條金腰帶,對香港國民精神嘅影響,其實不亞於香港隊賽和中國隊,香港隊賽和中國隊,多少有著一啲國家國民之間仇恨嘅元素,同港中關係緊張有密切關係,但 曹星如 打嘅拳王,有唔同嘅國家, 曹星如 甚至喺3月11日拳王之戰前夕,呼籲觀戰民眾要向對手致以掌聲,宣揚體育精神同武德,所以拳擊比起足球,仲少咗一重仇恨驅動嘅元素。當然,向井寬史都係拳王,一場王對王嘅賽事, 曹星如 八場擊倒對方,呢個都肯定係傳奇嘅一部分,因為之前向井寬史聲稱,佢打算八個回答擊倒 曹星如 ,但 曹星如 用行動回應咗向井寬史嘅牙擦回應。

曹星如 呢個香港夢,其實對爭取普選,爭取香港國際地位,甚至曾俊華爭奪特首都有鼓舞作用,甚至比獅子山下更在地。拳擊係拳拳到肉嘅艱苦作戰,擂台本身就係一個舞台,捱唔過艱苦嘅拳賽就咪鬼同人爭。獅子山下無一個戲劇性場面俾大家見到艱苦奮鬥同作戰,但拳擊係有好豐富嘅畫面,否則《洛奇》就唔會係美國夢嘅代表,甚至可以連拍七集咁多。曾俊華長期支持 曹星如 ,可謂惺惺相惜,面對林鄭月娥恃住中聯辦強大支持嘅拳手, 曹星如 精神借代入曾俊華身上,無疑係會激起支持曾俊華嘅人打逆境波嘅鬥志。

只不過, 曹星如 嘅香港夢,一如其他建基於體育比賽嘅夢一樣,其實都建基於賽制同裁判公平公正,以及觀眾願意尊重奮戰到底嘅拳手。如果賽制同裁判係同《少球足球》一樣嘅話,咁真係得周星馳電影至會有茅招出盡都照樣贏波嘅情景。但大家睇依家嘅特首選舉,都唔係睇拳手有幾努力,而所謂嘅拳證,自己亦都偏幫個別拳手,呢種就係黑拳,假拳。當然,如果曾俊華連黑拳都贏,本身都係一個勵志嘅故事,問題係,中國人無呢種尊重對手,以及尊重規則嘅傳統。葉劉淑儀呢次都力戰到底,但到底成個政壇,又俾到幾多尊重俾葉劉淑儀,其實大家都知道係點嘅一回事。

如果北京可以有一個公平公正賽制,同裁判,可以俾胡國興、曾俊華同林鄭月娥三位拳手公平較量,香港人會仍然願意睇拳賽,同俾拳賽存在。但如果呢次係明明有人技術性擊倒對手,結果都係無甚表現,甚至捱打甚至被KO嘅拳手贏,咁係無人再信 香港夢 ,以及香港成套制度,屆時一國兩制呢場拳賽,就唔慌有人會睇。屆時唔係14萬幾人同時喺facebook睇直播,而係得十個人喺facebook睇直播嘅淒涼局面。

喺3月24日,同樣喺會展舉行嘅拳賽,最後會出啲乜結果,我們拭目以待。

發表迴響

你的電子郵件位址並不會被公開。 必要欄位標記為 *