周潤發-曾俊華-min

周潤發 支持曾俊華,林鄭月娥可以點⋯⋯

林鄭月娥選舉工程,一直都搵娛樂界嘅人,希望入到屋,有蕭芳芳,有任達華,目的都係唔想民望上面,輸曾俊華六七條街,咁會極難睇。只不過, 曾俊華 陣營今日出大絕,竟然出動到 周潤發 嚟加持,林鄭月娥可以搵邊個娛樂圈中人加持,我真係好想知。

周潤發 係民間特首大熱

其實唔係乜娛樂圈中人都可以幫特首選舉候選人加持,因為香港娛樂圈啲人形象太惡質,平日啲政治言論,十之八九都笑死人。所以,實際上得幾個有呢個能耐,包括明顯親泛民嘅黃耀明、何韻詩同王宗堯,仲有就係被認為民間特首理想人選嘅劉德華同 周潤發 。但以 周潤發 係最理想,因為 周潤發 喺反國教同遮打革命都有好好嘅表態,但劉德華以往唱果首中國人,只令人覺得佢係一個會擦共產黨鞋嘅政治滑頭,所以如果論加持力而論, 周潤發 係首選,幾乎可以涵蓋深黃、淺黃、淺藍嘅群眾,就算深藍嘅群眾,都唔敢鬧得 周潤發 太過火,因為香港無乜邊幾個男星,有 周潤發 呢種無可挑戰嘅江湖地位。

依家 周潤發 同曾俊華一齊食公和荳品廠豆腐,仲要 周潤發 公開支持曾俊華,大家都知, 周潤發 呢番言論,好大機會係簽咗支持同意書,但威力,就強過果啲預先錄好嘅與曾俊華同行嘅片段太多,仲要一般嚟講,由於星期六下午係無乜新聞, 周潤發 挺曾俊華嘅消息,好容易喺social media同whatsapp洗板,你話曾俊華點可能唔攞到佢要嘅效果。簡單嚟講,呢次3月11日星期六突擊,成個林鄭月娥陣營應該係完全無準備過,被人殺個措手不及而完全唔知乜事。都未計曾俊華進入樂富,被成班樂富居民爭住影相,如果根據黃子華嘅高官入公屋無保鑣可以完整出番嚟可以做特首定律,曾俊華係應該夠做有突,咁北京硬要林鄭月娥去做特首,就係同香港大多數人共識作對,後果其實係好嚴重,北京係一定要仔細評估,咁樣玩法會有乜嘢政治後果,同埋呢個後果難唔難收拾。

但可以肯定係,林鄭月娥嘅民望回天乏力,只要有關於林鄭月娥嘅爆炸性黑材料,我可以講佢嘅情況仲衰過當年唐英年十倍,唐英年仲叫做咗陣民主鬥士,林鄭月娥?佢乜都唔係。

發表迴響

你的電子郵件位址並不會被公開。 必要欄位標記為 *