林占士-min

林占士 嘅評論:不完全同意,但有節有理

德高望重嘅英華混血退休警司 林占士 ,並無出席果次講出猶太人事件嘅集會,佢批評依家啲人撐警嘅做法變咗好似爛仔咁。佢同意七警應該係有罪,只不過判刑咪咁重。

如果警隊依家啲人,個個有 林占士 咁嘅理性頭腦,就唔會搞到依家咁樣一鑊泡。

林占士 反映係皇家警察嘅氣度

林占士 認為七警係應該有罪,其實呢個係警隊應有嘅常識,如果同個suspect有衝突,可能有過度反應,都未必構成ABH,但依家故意打犯就至少ABH。 林占士 認為判刑太重,我唔同意,但尊重佢老人家睇法。 林占士 係1967年嘅香港警察,果個年代嘅香港警察訓練同思維模式類似北愛爾蘭嘅 Royal Ulster Constabulary ,偏重軍事化,以及無咁注重人權觀念,加上1967年班土共確係恐怖分子,同 The Trouble 年代嘅IRA一樣,所以我對 林占士 嘅睇法,係不同意,但尊重。

當然, 林占士 果個年代,對執法人員喺ABH上知法犯法係判得無咁重手,但依無論英國定香港,法庭嘅判刑指引同案例都係偏重,濫用權力係加刑嘅考慮因素, 林占士 嘅睇法同依家香港人睇法唔同係唔出奇。七警案點判刑,係可以討論,有人認為過輕,有人認為過重,攞法律嚟講就係。

但 林占士 最令人尊重一點係拒絕參與藐視法庭嘅行動,執法機構係維護法律,點可以公然侮辱法官,咁警察自己都唔尊重法律,你叫人點尊重執法人員?無論鬧法官係狗,定係將警察比喻做猶太人,都係明顯有失身份嘅舉動,有正常腦袋都唔會附和,所以 林占士 係好清楚一個警官應有嘅底線。加上佢係曾經處理六七暴動,其實佢知果啲侮辱法官嘅言論,實在係乜嘢貨色嚟,無理由支持警方將香港警察推向義和團化、紅衛兵化,只不過 林占士 唔方便將呢啲講法宣之於口,佢唔係曾蔭權咁有膽量。

其實香港警察喺七警案已經輸清晒所有聲望,要重建固然唔容易,仲有啲倒米組織推波助瀾,為呃維穩費,忙死香港警察形象未去到俗底。其實警察學 林占士 咁講嘢,可能七警仲有機會特赦或減刑,依家?成枝警隊砍掉重練好。

發表迴響

你的電子郵件位址並不會被公開。 必要欄位標記為 *