朴謹惠

朴謹惠 落台,跟住點⋯⋯

搞出大韓民國立國以嚟,其中一場最大政治大頭佛之一嘅閨蜜干政事件,終於落幕,大韓民國憲法法院以八比零裁定, 朴謹惠 需要因國會嘅彈劾動議落台,立即降為平民,兩個月重新大選。

會唔會有第二個 朴謹惠 ?

喺金正恩完全暴走嘅時刻, 朴謹惠 落台快啲大選係好事,南韓人可以透過大選,決定點樣對付金正恩呢個癲佬。而南韓人對新聞自由嘅重要性,特別成個新聞產業應該點走,亦有一個新認識,而保守派力量,亦會好一段時間重振唔起嚟,畢竟呢件事實在太離譜。只不過,會唔會有第二個 朴謹惠 呢?呢個問題,以我對南韓人民族性嘅認知,我要打個問號,如果南韓人唔解決成個社會文化一啲關鍵問題,係仲會有閨蜜干政呢啲離譜到一個點嘅事情發生嘅。

首先係宗教,南韓有一樣特色,真係十分之中華特色,就係民間啲奇怪信仰好興盛,特別果啲基督教撈埋民間宗教果啲怪物,呢次閨蜜干政事件,令南韓人認識到呢啲怪宗教可以控制同深入社會精英階層到乜程度,基本上,成個漢字系社會,新加坡、台灣、甚至日本同契丹都有呢個問題。如果南韓人唔認清呢啲古靈精怪宗教嘅教義係有問題,而任由呢啲宗教深入生活每一個環節嘅話, 朴謹惠 嘅鬧劇係會再發生一次,甚至唔只一次。畢竟呢啲魔僧式問題,往往會出現喺未經歷過歐洲政教合一爭論洗禮嘅地方。西方唔係無奇怪宗教,但歐洲會視政教合一係一種邪惡。(唔好同我講英國聖公會,英國聖公會本來設計係國王為擺脫羅馬教廷制肘搞出嚟,根本係以政領教嘅另一種奇怪物體嚟)。

另一方面,南韓嘅新聞產業可以有幾大改變,閨蜜干政風波,最初係大部分主流傳媒沉默,甚至偏幫 朴謹惠 ,得一間收費台JTBC由頭到尾窮追猛打到底,報紙係一向比較自由派嘅《京鄉新聞》有追貼,後來因為情節同證據越嚟越黐線,主流傳媒至侷住跟,但係主流傳媒已經將公信力輸清光。但係南韓嘅財閥,或當權者,只要仍然係漢字系社區果套,認為傳媒可以隨便收買,要公眾又唔注意,就可以重新出現問題。畢竟 朴謹惠 後面班友受重挫,但仍然財雄勢力,一如台灣,啲賣台傳媒仍然老神在在一樣。傳媒網絡化,似乎係必不可少嘅課題。

===
擺明到網站廣告,圖片係嚟自寰雨膠事錄

發表迴響

你的電子郵件位址並不會被公開。 必要欄位標記為 *