ITN-min

ITN 模式:拯救有線新聞部可以考慮嘅方法

喺有線寬頻可能面臨執笠危機後,好多人諗到有線新聞可能救唔到,想拯救有線新聞部。我明白呢種諗法,只不過一個可能商業模式係重要,特別電視新聞駛費龐大,唔可能吓吓靠眾籌,呢個係相當天真嘅諗法。一定要有一個可行嘅商業模式,至可以拯救有線新聞部。而 ITN 模式,可能係有線新聞部其中一個可行出路。

ITN 模式:賣新聞、賣archive、賣production

英國商業電視廣播,因為唔係全國一統,最初係將全國分成若干區,唔同公司hold唔同licence,至今北愛爾蘭同蘇格蘭嘅ITV都係獨立運作,但係有啲部分,又要全國一統,例如全國性新聞,以及早餐時段(早餐時段係獨立licence嚟),英國早餐時段嘅牌照後嚟變咗ITV Breakfast,而新聞部,就各地區嘅獨立電視牌照持有合組一間公司去做,呢間公司就係ITN。依家,英國 ITV(包括STV, UTV一統時段嘅新聞)、Channel 4同Five Channel嘅新聞都係ITN製作,當然,ITN亦會賣舊片片庫,以及幫一啲企業拍宣傳片製作工作嚟賺錢,唔通齋靠新聞可以養到咁大棚人咩。

有線新聞部係一間獨立公司,有相當大嘅舊片資源,其實可以賣舊片去幫補。與此同時,如果有電視台,或電台,想外判咗個新聞部出嚟,亦可以交俾呢間公司負責,當然,都可以搞個新聞網站出嚟,其實呢間新聞網站,好似有線新聞台咁run,會有好多人肯俾費用去訂,因為好多人都頂唔住CCTVB新聞部,或者想睇有線新聞,但由於CS太惡名昭彰,果個希特拉都cut唔到台嘅問題,令好多人卻步。但如果希特拉cut唔到台問題解決咗,依家英國、美國都開始興起廿四小時播咗個網睇新聞,其實並非無可為,況且有線中國組咁聞名,其實海外新聞機構都可能委托有線新聞部獨立出嚟嘅公司製作同採訪中國新聞,根本係有得做。

但依家有線新聞部嘅人,可能要搵個人投資,同代表員工談判將個台搞management buyout嘅問題,我相信如果價錢合適,呢個係合符上市公司利益。

發表迴響

你的電子郵件位址並不會被公開。 必要欄位標記為 *