有線寬頻-min

點解 有線寬頻 無人想買

九倉宣布,終止所有 有線寬頻 潛在買家間嘅商討,但與此同時,一到期後,對 有線寬頻 嘅財政承擔到此為止,由得 有線寬頻 自生自滅。當然,呢個反映契丹缺水,未必再願意花錢收買香港傳媒,畢竟香港傳媒未必走到資,啲人唔會做,不如問九倉買多幾個豪宅單位好過。但另一方面, 有線寬頻 喺企業品牌同技術上有一大堆問題,你買咗返嚟都要有好多錢去執,隨時仲大鑊過買亞視返嚟,真係阿水都怕。

有線寬頻 DOCSIS 網絡係致命傷

雖然 有線寬頻有一批光纖客,但好多人仲係用緊 DOCSIS 3.0嘅Modem上網, DOCSIS 3.0正係問題嘅根源,點解咁多人媽爆 有線寬頻 個上網服務,正正因為 DOCSIS 技術,根本唔適合香港環境使用,我喺2000年做緊CTI果陣,都跟過吓HKBN啲工程嘢,當時HKBN用3com嘅DOCSIS modem作為公屋嘅last mile,但用用吓就知唔對路,王維基當時當機立斷,改用光纖入大廈,再用 Cat-5 線直接Ethernet入屋,王維基嘅工程背景救咗成間公司,HKBN之所以超越 有線寬頻 關鍵就係 last mile技術嘅穩定性。依家你要投資幾多錢改晒啲 DOCSIS 線路做光纖?呢個仲涉及電視觀眾嘅問題,我相信好多潛在買家,喺技術上計唔掂數,再加上九倉做生意一向係計到盡,算到盡,對好多契丹人嚟講,隨時扣埋當中要分俾中間人啲錢後,就無肉食,咁何必呢,所以 有線寬頻 有傳媒影響力,但個network唔掂,所以無人買得起。

另一方面,當全香港人都知道希特拉都cut唔到有線後, 有線寬頻 嘅 customer service 簡直去到澳牛級,否則唔會有人要用武力衝上有線總部至cut到有線咁大單案發生咗。要改變成個公司嘅管理陋習,特別CS呢方面,又要花幾多力氣?雖然香港電訊界嘅CS,普遍都係垃圾級別,但 有線寬頻 嘅問題,應該係全香港最嚴重果間,呢個又係要動大手術至搞得掂,有乜嘢人有呢個魄力去執咁大壇嘢至得架。

或者王維基有多啲錢嘅話,叫王維基買 有線寬頻 ,仲有少少機會救得掂,雖然佢應該唔會買,有錢都未必買, DOCSIS 網絡實在令人怕怕,見過鬼都怕黑。

發表迴響

你的電子郵件位址並不會被公開。 必要欄位標記為 *