鄭經翰-曾俊華-min

鄭經翰 你唔係應該去提振薯片支持者士氣嘅咩?

梁振英嘅統治唔應該持續落去,我相信係好多香港人,包括我或者 鄭經翰 在內嘅共識,只不過, 鄭經翰 喺近日D100嚤囉街高談闊論復刻版節目果度,做咗一啲好神奇,同呢個共同目的有違嘅言論,除咗話曾俊華一早準備選特首外,仲話林鄭月娥應該會當選,曾俊華大勢而去。

我聽完好詫異, 鄭經翰 縱橫政界咁多年,同林鄭月娥、曾俊華都交手過,佢無理由唔知佢自己倒緊米啩?

鄭經翰 應該知曾俊華嘅戰略

其實 鄭經翰 應該知道曾俊華嘅戰略,就係不斷凝聚民意,契丹共產黨有幾專橫都好,香港至少有幾十萬無中國國籍嘅外籍人士,幾百萬持非中國國籍嘅人,住喺一個建基於國際條約上城市,一如《基本法》23條一役,就唔可以太過逆民意而行,如果曾俊華係香港共識果陣,屆時當賣個順水人情俾習近平都好,習近平有足夠能量去迫中聯辦將手上可以控制嘅飛改投曾俊華,一如果次梁振英政變一樣,如果梁振英無民意,我唔信佢可以贏到唐英年,當時唐英年醜聞太核突,確係北京好難落台一個理由。如果照呢個戰略, 鄭經翰 唔應該講埋啲倒米說話,而係要煽動群眾更主動支持曾俊華,避免林鄭月娥可以延續到梁振英嘅統治,呢個戰略問題,我都識睇, 鄭經翰 工程師縱橫政界多年,我完全唔明白點解佢講啲倒米說話,一係 鄭經翰 收到啲更堅嘅江湖內幕,咁唔該早少少爆晒出嚟,等香港人自己識執生,一係 鄭經翰 有啲更犀利、超卓嘅秘密武器,可以無民意都可以擊敗林鄭月娥,如果係都唔該快啲透露啲出嚟,等市民見識一下鄭工程師嘅政治工程學。

鄭經翰 喺成個特首選舉中嘅策略,古靈精怪,一時又話自己出嚟選,一時又喺度背動策動自決派支持長毛,搞到長毛同自決派一面都係,如果自決派同長毛堅持投白票,其實公眾好容易知道,亦幾乎係大大影響自決派嘅政治前途,大家睇睇DQ官司嘅眾籌,就知道長毛咁樣出嚟選,根本係搞到自己同自決派內傷,但又好似無人出嚟幫長毛同自決派修補形象,反而田北俊請長毛上電台節目,叫長毛教女士保養頭髮,田北俊幫長毛仲多過 鄭經翰 咁囉。有啲人嘅行為,實在令人不解又不解。

發表迴響

你的電子郵件位址並不會被公開。 必要欄位標記為 *