田北俊-min

田北俊 嘅商界薩長同盟宣言

田北俊 以頭號薯粉身份,拍曾俊華拍片,由於田北俊係有自己一張飛過嘅選委名單,好大程度, 田北俊 咁樣上陣,代表商界抵抗運動已經無所畏懼, 林鄭月娥 得票係唔係579,其實係有懸念。不過,呢個唔係最重要主題,更重要主題係,呢段片,其實係 田北俊 自己嘅一段政治宣言。

田北俊 嘅香港商界薩長同盟宣言

一直以嚟,我都主張需要同商界尋求合作,呢個係民主運動嘅需要,亦係香港民主政制長期鞏固嘅需要,長期以嚟香港極左光譜佔據民主運動,係無法達致執政目標,民進黨都要向右調整,至成功執政(甚至人民行動黨都係),但大家都知自李鵬飛走後,自由黨大多數人都唔似有guts,廿三條一役 田北俊 臨陣倒戈,你或者講佢係撞手神,但依家 田北俊 嘅商界薩長同盟政治宣言,反而表示咗,經過十幾年政治浮浮沉沉嘅佢,終於某程度上開竅,接到李鵬飛留低嘅政治議題。而 田北俊 嘅呢次嘅宣言元素有以下呢幾樣嘢

  1. 香港優先,領導人必須要敢支持香港隊,佢未必係百分百本土主義者,但佢呢方面,係比左膠優勢。(當然同獨派好有距離)
  2. 香港必須喺唔同政策範疇上尊重民意,同埋嘗試同另一個政治集團尋求妥協

簡單嚟講,佢同時同香港另外兩個會共同反中聯辦,但一直同商界互有猜疑矛盾嘅政治力量,包括主張捍衛香港利益嘅本土派,甚至獨派,以及泛民交出嘅宣言,佢認為一定要聽,甚至接納泛民主派嘅意見,而喺政策立場上,要係先支持香港人,企喺香港人果邊,要由香港人當家,呢個已經係試圖同兩邊交心,你以往,點可能會聽到佢會試圖取信泛民同本土呢兩個陣營,就算係豬狼之戰打到最激烈果陣,商界都始終唔敢講任何嘢試圖取信「長州藩」。

大清帝國會退出政壇,都係北洋軍閥喺關鍵時刻支持革命軍遜位要求,縱使係由袁世凱擔任首任大總統都好,當年革命黨人嘅政治計算同決定係好有日本風味。依家田北俊清楚喺片段中講明,至少佢本人願意有呢種合作,如果唔係好似李鵬飛同泛民關係咁,最終變成李鵬飛一條友變咗泛民之友嘅局面,而係成個商界抵抗力量可以過拉嚟,呢個對未來香港政局有關鍵影響,大家唔好遺漏呢段政治訊息。

暫時嚟講,得一個人似係收到呢個訊息,就係以蜀漢嚟比喻泛民嘅戴耀廷教授。「戴妖」都係一個戰略人,佢有相當戰略閱讀能力同視野,否則唔會有佔中同雷動計劃兩個後嚟證明有佢戰略合理性嘅計劃,雖然佢執行得好膠。雖然,為求目的,不惜玩膠都係戰略人嘅常見毛病,睇得多歐洲,特別法蘭西新聞都慣咗。

發表迴響

你的電子郵件位址並不會被公開。 必要欄位標記為 *