路訊通-min

路訊通 點解會玩完?

路訊通 據聞喺六月停播,雖然 路訊通 對停播一事不予置評,只不過,因九巴啲新車都無 路訊通 嘅熒幕,大家都知呢項被認為擾民嘅服務,玩完係遲早問題,同埋擺電腦嘅空間,租俾PCCW提供Wifi服務可能仲受公眾歡迎同接納。

如果比較過日本JR喺列車車廂電視嘅做法,其實 路訊通 失敗係預咗,甚至喺車上播廣告果啲所謂廣播服務,會一間接一間咁摺,直至啲友仔知道佢地嘅模式係錯到離晒譜為止。

路訊通 唔知時代改變

路訊通 最初推出果陣係吸引,因為香港巴士經常客滿,根本好難睇報紙,而 路訊通 喺智能手機未普及嘅年代,提供到一定娛樂同資訊,呢個係點解呢項擾民服務,喺推出初期並非完全無吸引力嘅原因。佢初推出果陣,係有佢存在嘅合理性。

只不過有智能手機之後,講真,如果我要睇資訊同廣告,駛鬼睇你 路訊通 果啲製作質素嘅節目咩,點解我唔睇自己嘅手機,相反,喺香港人工時越嚟越長嘅情況下,有部分需要喺巴士瞓覺嘅人,認為 路訊通 極其擾民,因此廣告效力就一路係咁跌,最後廣告客戶發現咁唔對路,寧願將廣告預算撥入Google同facebook,當出現呢個時候果陣, 路訊通 除咗等執,仲有乜好做。

喺日本,車廂電視係仲有市場,但日本JR嘅車廂電視,一般係靜音,而且係伴隨住報站系統一齊,好多人喺火車要睇下站係乜站、邊一邊門口會開,有乜線可以轉車,邊個站出現人身事故呢啲資訊果陣,一併睇埋廣告,而且呢啲廣告,唔少係伴隨住一啲趣味冷知識,任天堂喺JR東日本搞果堆就好成功。如果九巴、新巴、城巴要搞車廂熒幕廣告,一定係同佢地現有嘅報站熒幕整合做,而且係靜音至會有人睇嘅,喺呢個時候,亦只能由巴士公司自己經營, 路訊通 根本無用武之地,除非 路訊通 轉型為一間提供交通資訊服務公司,類似trip planner之類,但依家運吉署啲資料根本唔開放,得九巴自己嘅data有鬼用咩,結果路訊通仍然要面對玩完嘅命運,因為香港嘅大環境,根本係無轉型嘅空間俾 路訊通 。一間做臭咗朵嘅過時公司,係時候結束歷史任務。

發表迴響

你的電子郵件位址並不會被公開。 必要欄位標記為 *