北韓-馬來西亞

北韓 – 馬來西亞外交危機:隨時搞出一鑊粥

由金正男喺KLIA被殺引發嘅 北韓 – 馬來西亞之間外交危機,越搞越大劑, 北韓 玩到扣留馬來西亞喺北韓嘅僑民(其實都係外交人員及其家眷),馬來西亞亦唔俾 北韓 使館人員走,除非交出涉嫌殺金正男嘅凶手,依家越玩越大劑。

北韓 搵錯國家落手

北韓 班友落手果陣,我唔知班友知唔知馬來西亞唔係一般東南亞國家,依家馬來西亞某程度上係聽命於契丹嘅國家,所以契丹唔方便出手教訓 北韓 嘅時候,依家喺吉隆坡殺咗契丹嘅人,首相納吉政府只要得到契丹默許就可以好強硬,你見納吉依家態度咁硬,加上華裔政黨普遍支持嘅態度,大家都應該估到無契丹嘅支持,馬來西亞係唔會喺外交問題上吓吓企到咁硬,以往 北韓 仲聽契丹話果陣,我相信契丹一早派人調解件事,根本唔會搞到咁失控。而契丹亦都想透過馬來西亞嘅強硬舉動, 向南韓顯示契丹係有盡責任,盡量嘗試令南韓唔好咁快部署薩德導彈,當然,北韓咁亂射廿四法,一早射咗去日本海,南韓梗係睬契丹政府都傻。連日本都想美國部署薩德導彈,就可以見到大家對契丹控制北韓能力幾無信心。

當然 北韓 唔可能對馬來西亞發動戰爭,但如果 北韓 做啲太過份嘅舉動,例如 北韓 送晒啲馬來西亞公民去勞改營,或者全部殺清光嘅話,事件可以好嚴重,雖然馬來西亞某程度上係契丹隻狗,但馬來西亞仍然係英、澳、紐、新、馬五國聯防成員,郁親馬來西亞同時郁齊四個遠東同歐洲強國,再加美國、日本全部可以出聲,而契丹如果呢步走去幫 北韓 ,又係搵自己笨,換言之, 北韓 呢次隨時招惹全世界人圍抽佢,而完全無人可憐佢,因為當今世上,都唔知仲有邊個同個國際政治癲佬做朋友。所以呢次金正恩發窮惡,好可能係引火自焚。

但契丹能唔能保留 北韓 呢個緩衝區,我認為可能性越嚟越低,一方面,依家根本平壤已經唔喺契丹控制範圍之內,一如我七年前講,你唔趁buy time果陣郁手,你就自己要承擔惡果,依家咪喺我戰略預計之內。依家契丹唯一可以做,就係諗辦法推翻金正恩政權,契丹東北地區準備接收難民,如果唔係,我睇嚟朝鮮半島都係留名睇大亂。

發表迴響

你的電子郵件位址並不會被公開。 必要欄位標記為 *