連登仔

連登仔 喪過高登仔:兩條友東海道同你行晒佢

自連登成立後,好多人都唔識分 連登仔 同高登仔,因為兩個forum確係好似樣,只不過,有兩件事,其實好容易區分到 連登仔 同高登仔,一件事係有個叫蔣中正嘅 連登仔 起晒啲吸血中介嘅底,搞到俾人淋黑油,仲要警察好似唔理咁(依家明晒,因為七警嘅捐款),另一件唔係咁政治嘅事,可以分到 連登仔 同高登仔,就係兩條友沿東海道由東京行到京都。

乜話,東京行到京都。

連登仔 係行動導向

想知道兩位 連登仔 每日點由東京步行到京都,可以睇呢度

以往大家批評高登仔最多係鍵盤戰士,雖然好多社會運動,其實都係高登做起點,但經常有高登仔講就天下無敵,做就失蹤嘅事時有發生。 連登仔 係高登仔嘅進化,一啲喺西方或日本係應該有人做嘅事,香港無乜人做,或唔敢做,佢地就會付諸行動,好似起吸血財務中介底,果單係堅過好多傳媒,大佬搵命搏,蔣中正比factwire更需要一個安全地方囉(一係factwire你跟埋佢),你睇完覺得香港傳媒都廢柴主導。而東海道東京-京都行,雖然日本有人都會做(你睇番個post,有對日本男女行晒成個日本制霸,真係熱血到一個點),但香港真係呢兩條友咁樣每日公布自己行程,簡直係開創先河,台灣唔知有幾多人聽李登輝講,行晒成條奧之細道(更喪,學松尾芭蕉咁行就無乜可能㗎喇,只不過你坐飛機坐車都可以去晒松尾芭蕉當年去過啲點,你已經好好嘢),但香港有兩條友由東京行京都,呢個你睇到一個新時代嘅分別,一個經歷過五年振英之亂後香港新生代嘅分別。(我可以講,啲阻住地球轉嘅老人,真係可以叫廢老,你敢步行東海道?)

如果我係航空公司嘅 PR ,真係會快啲搵果兩個 連登仔 ,贊助晒沿途旅費、食宿、data等開支,甚至提供必要嘅裝備支援,佢地facebook live住東海道,鼓勵更多人買機票去日本完成自己嘅壯舉都好,當然,好明顯依家啲航空公司嘅PR 同 marketing 仲未知道時代已經變緊,如果香港啲PR 同 marketing 可以追得上時代嘅巨輪,就唔會係咁有大公司,甚至好似林鄭月娥呢啲政棍日日都搞出關公災難俾大家嘆喇,係唔係?

(後話,我知道呢個壯舉,因為黃之鋒私人facebook share呢個post, 連登仔 做嘅嘢,其實好多人留意到)

3 thoughts on “連登仔 喪過高登仔:兩條友東海道同你行晒佢

  1. 明顯各下都係好遲先上高登, 其實而家連登呢班先係二千年前既高登仔MODE

    當年既高登先係真正卧虎蔵龍, 上得去既多數都係電腦相關既從業人仕, 所以什麼改圖P圖, 拆CODE, 起底, 當年真係冇人走得甩, 但而今呢班人絕對有四十開外, 所以一路以來不斷流失, 加上新血只係慕名上去既, 好多都係學生輩同八卦人仕, 所以形成鍵盤戰士主導既局面

    1. 我2002年上高登架,你睇番我明報嘅文。

      我知最元祖果啲高登仔有幾喪

  2. 樓上Johnny,黃兄喺2000年代初就已經「初代律師信魔人」聞名於高登啦(第二代魔人為689),點會遲上高登?

    下次查下Google或「香港網典」(雖然準確性成疑,但都叫做starting point)啦。

發表迴響

你的電子郵件位址並不會被公開。 必要欄位標記為 *