林鄭月娥-ITVision

林鄭月娥 去到客場係唔識踢波

IT Vision 搞咗個資訊科技界選委嘅論壇,資訊科技界有成三十張選委飛, 林鄭月娥 如果咁想大獲全勝,好應該出席個論壇,但 林鄭月娥 已經通知咗IT Vision果邊,決定唔出席個論壇,佢個口號話we connect,我真係唔知connect咗去邊?

林鄭月娥 主場都踢到咁核突,更何況客場

我相信 林鄭月娥 唔去IT界論壇,係因為佢自己喺民主思路果場近乎主場嘅論壇,表現都核突到爆,咁更加唔好講去到IT界呢個惡人眾多嘅客場,恐怕俾啲選委,連埋選委後面啲選民插到七孔流血都似。

其實昨晚果場民主思路嘅論壇, 林鄭月娥 嘅表現係好核突,當然,一方面係因為 林鄭月娥 以為胡國興係唔識打debate,呢個證明佢對法律界欠缺認識,胡國興1986攞到紐約州執業律師資格,1987成為御用大律師,呢個qualification,同湯家驊係同級,結果係同場理虧嘅主持人湯家驊一樣照俾胡國興抽水抽到乾晒,呢個係大狀嘅功架嚟。做大律師未必好叻debate,但如果係做得御用大律師果啲,就一般辯才同轉數都十分之高,所以佢客場入嚟同你打都可以和波。所以 林鄭月娥 自己喺主場都踢到屎一樣,仲要搞到連湯家驊呢個偏頗球證,都被人提番果啲未公開,但阿水都知嘅醜聞果陣,你覺得佢敢落去IT界個場打,所以佢一早throw the white towel。

我相信,真係值得睇嘅辯論,係教協果場,因為教協嘅江湖地位,所以三方都答應出戰,而 林鄭月娥 如果連教協果場都唔出戰,佢日後贏咗個位都唔駛旨意管落去,果場會係見真章嘅一場大戰。但我初步評估, 林鄭月娥 好可能被人圍攻攻到傻。曾俊華辯才其實係三方最弱,但佢本身有抽水能力,同埋胡國興嘅火力好強大,我相信一進入狀態, 林鄭月娥 會係咁被胡國興炮轟。大家仲要記住一點,胡國興係法官出身,法官講嘢喺香港大家都知,都好鬼準同埋mean,我真係食住花生想知,未來一個月, 林鄭月娥 同佢後面啲狗頭軍師,係打算點面對呢場戰爭,我唔認為呢班友有能力應付呢場選戰而嚟嘅連場惡鬥。

發表迴響

你的電子郵件位址並不會被公開。 必要欄位標記為 *