張曉明-詐騙電話

張曉明 為表清白,應該呼籲選委報警

較早前,係咁有新聞報,中聯辦係咁打電話俾選委,話一定要投俾林鄭月娥。今日有記者喺北京問 張曉明 有無人打過呢啲電話, 張曉明 話呢啲全部都係謠言嚟,否則 張曉明 有落柯打打電話俾選委。

咁就好笑喇,呢件事如果我係 張曉明 ,一定呼籲選委報警。

如果 張曉明 無打過,即係詐騙集團太歲頭上動土

如果 張曉明 無落柯打打過,中聯辦無為林鄭月娥拉票,咁啲選委收果啲電話,係乜電話嚟,唔通係鬼電話。照正常邏輯推斷,應該係果啲扮順豐速遞,扮公安,扮入境處果啲詐騙電話,之前啲友仔連公安都扮,咁唔爭在扮埋中聯辦,唔趁選舉賺一筆,呢啲唔似係強國嘅騙徒會放過嘅財路。所以, 張曉明 要保清白,話呢啲報導係謠言係唔夠,佢應該搵中聯辦警務聯絡處果啲官員,再喺電視上公開呼籲,中聯辦絕對唔會介入香港選舉嘅,如果有任何人聲稱係代表中聯辦,一定要你投某某某,甚至唔投某某某,可能二奶就會被判刑果啲,全屬詐騙電話,如果收到果啲電話,立即報警,應呢,大家仲會信中聯辦無打過果啲電話,無迫人上去深圳見啲官員,甚至印定有選委身份證號碼嘅提名表格,迫啲選委提名某某某候選人咁離晒大譜。

張曉明 係唔敢公開宣稱呢啲電話係詐騙電話,除咗情節太膠之外(雖然可以現實有咁膠),更大問題係,依家 張曉明 喺北京,面對習系啲人,又唔敢認自己有做,但為咗自己啲著數同權位,又要繼續利用中聯辦個朵搵食,迫啲選委投票選佢心水嘅候選人,結果咪喺記者面前只係講,呢啲報導全部都係謠言。但識中國政治都知,政府話謠言果啲嘢,往往十之八九最後都係堅過石堅。如果張曉明依家話呢啲係謠言,又唔敢公開叫選委報警求助,照契丹共產黨凡事倒轉嚟讀嘅玩法,其實你自己係咪認咗有動員中聯辦嘅資源,迫選委提名或投票俾個別候選人咁?

依家人大政協兩會之後,反而特首選舉嘅形勢會更加唔明朗,因為啲選委肯定多少會收到嚟自習系嘅訊息或風聲,當知道統監府啲料隨時係流料果陣,你覺得你係親共選委嘅話,你會唔會等一等,睇清楚形勢至好做嘢,畢竟呢班太監,都係西瓜倚大邊。

發表迴響

你的電子郵件位址並不會被公開。 必要欄位標記為 *