七警-黑幫

七警 可以收捐款打官司,但唔係收黑幫相關人物囉

毆打曾健超嘅 七警 尋求上訴,尋求上訴四處籌旗打官司以及俾屋企人生活費,應該係可以嘅,只不過,如果有啲有損其他伙記尊嚴,甚至影響執法嘅話,呢筆捐款係無理由收。而今日其中一筆捐款,當中涉及香港主要黑幫關連密切嘅人物,我就唔明點解收得落,特別警務處長,點解可以容許收呢筆錢。

七警 係反黑組成員,乜人都收得,就係唔收得同黑社會有關嘅人

本來警務處長應該落柯打,講明可以向社會各界人士捐款,但必須避免同黑幫有關,否則香港警察最後尊重都保唔住。其實警察乜部門都好,本來就應該婉拒黑幫關連人士嘅錢。

但依家 七警 更大鑊係,佢地全部係反黑組,有兩個好嚴重嘅問題衍生出嚟,如果我係做反黑組嘅差人,真係會劈炮唔撈算數。

  1. 依家反黑組有人被定罪,竟然係黑幫啲人捐錢出嚟,呢啲對反黑組嚟講,係羞辱定出於好意?呢個一定係嚴重打擊仲想喺打擊罪案上做啲實事嘅警察士氣
  2. 原來反黑組被定罪,黑幫相關人士會出嚟捐錢,咁市民點評估反黑組同黑社會嘅關係,咁市民仲信唔信反黑組係堅定企喺市民果邊,打擊三合會相關罪行?

好多警察仲以為撐 七警 活動係撐自己,如果啲警察係好似曾志偉咁,以為七十年代收片果種做法係無問題,自甘成為corrupted cop,無問題,咁go ahead,但如果現職警察係仲想透過踏實工作挽回市民嘅信心,咁係應該同警隊高層,以至 七警 家屬講清楚,乜嘢人嘅錢都可以收,但果啲同黑幫關係密切嘅人嘅錢,就一蚊都唔可以收,呢個係一個作為執法人員嘅底線問題,如果連呢筆錢都可以收,咁就真係底線完全崩潰,係唔係代表香港警察返到去七十年代收片乜都得嘅年代,咁樣嘅話,香港市民就真係只會當警察係有牌爛仔,而唔會有人尊重你,甚至市民仲敢唔敢舉報黑幫相關罪案,我都好懷疑。

我只可以講,盧偉聰、黎棟國呢啲人,為咗政治,容許黑幫咁樣玩法,同台灣一樣。台灣治安出問題,同國民黨勾結黑幫,係有絕對嘅關係,政客勾結黑幫,執法人員又點可能做嘢?睇依家香港嘅形勢,香港治安急劇惡化,只係遲早問題。

發表迴響

你的電子郵件位址並不會被公開。 必要欄位標記為 *