雲端-1-min

契丹 雲端 有成功過嗎?

iProA 果啲親契丹IT人,成日話契丹IT幾咁成功,要呃果啲唔熟IT嘅人或者仲得嘅,只不過,如果細心睇契丹果啲所謂 雲端 技術,如果唔係契丹政府故意整啲防火長城,契丹嘅IT業根本係唔存在。但可以咁講,如果維持依家契丹嘅防火長城落去,契丹更加唔會有自己獨有嘅雲端技術,亦唔會喺硬件設施上成為重要基地,而契丹整體嘅生產力水平,就被果啲山寨雲端產品搞到一鑊泡,最終輸俾可以自由使用正貨雲端產品嘅國家,例如實行民主多年嘅印度。

阿里雲所謂 雲端 只係copycat

如果講契丹做 雲端 最大,一定講阿里雲,阿里雲係隨住阿里巴巴而嚟,發展軌跡同Amazon Web Services好似,本來用喺Amazon自己內部技術,因為考慮到市場可能有同類需要,所以索性將自家基建攞出嚟賣錢,變咗一個同Amazon本身鼎足而立嘅業務單元。但係,阿里巴巴搞嘅阿里雲,同AWS本質上就十分之有分別。

阿里巴巴係我少數認為係原創,而且係受國際認可嘅契丹IT Project,因為阿里巴巴有契丹嘅世界工廠優勢,以及當時無一個好好處理契丹同世界需要嘅B2B平台,但唔係本身技術特別穩定同優勝,even淘寶網,某程度上亦只係mix with ebay同amazon。而阿里雲,就明抄AWS,AWS叫EC2,阿里雲學人地叫彈性運算,連啲instance分類名都好鬼似,人地AWS就c4.large, c3.large,阿里雲就 ecs.n4.large。只不過,穩定度差天共地,領教過淘寶網啲亂龍payment,以及SMS,同埋果啲不知所謂嘅阿里旺旺通訊平台,你再比較amazon,或者建基於AWS嘅電子商貿平台,例如shopify,真係完全兩碼子事。

呢個因為,AWS本身其實係 雲端 先驅,Amazon增長喺科網爆破後仍然持續,越變越大,巨量嘅資料處理只有Amazon要獨力面對,Amazon自己開發咗一套解決問題嘅技術後,認為其他公司都會同樣面對類似問題,所以至開始有EC2、S3等產品同項目出現。所以Amazon好多嘢都係原創,所以普及嘅商用 雲端 由AWS開始,其實係無死錯人嘅講法嚟。

咁至於阿里巴巴,如果阿里巴巴提得出一套原創嘅嘢,就唔會出現連IAM呢啲嘢都要抄,仲要話依家公測。其實成個阿里巴巴集團,除咗阿里巴巴,以及螞蟻金服旗下嘅芝麻信用屬於原創,其實果啲係乜呢,支付寶咪抄paypal、淘寶網咪抄ebay、成間公司,都充斥住呢啲元素,而由於喺契丹政府保護之下,呢啲穩定度同可用度遠遠無得比嘅服務,喺契丹嘅壟斷優勢下壯大,但一走出契丹,吓,乜X嘢嚟㗎,根本無幾個人會考慮用。

唔只阿里巴巴,其實成個契丹所謂IT巨頭,都有呢類問題,騰訊嘅QQ根本係抄ICQ,WeChat係將LINE等軟件同生態系統再抄過嚟,百度係抄Google,跟住滴滴出行,其實係山寨Uber,呢個根本大家心照。契丹政府就係實際上為咗自己政權需要,搵班友去山寨人地嘅IT服務,但實際嘅技術內容以至穩定度,就完全無去深究過。請問邊個咁大膽,敢用契丹嘅 雲端 服務嚟做開發,至少我唔敢。所以呢啲IT公司,一定效忠共產黨,因為無共產黨,只要美國果啲真技術可以自由同佢地競爭,消費者會用邊一邊嘅服務,其實大家心裡有數。

作為一個香港為基地嘅content provider,我用嘅雲端服務幾乎都係美國公司,因為契丹喺政治上,以至啲人喺技術上,又無原創性,又無穩定性,更無自由度。而大家睇騰訊、阿里巴巴呢啲公司嘅態度,你唔會認為呢啲公司會有心學習喺一個有民主嘅社會,自立自強咁樣去創新,去銷售自己嘅服務,更唔好講成為民主嘅推手,只要呢啲寫出大量有bug軟件嘅公司睇唔到自己嘅處境,一旦共產黨倒台,就會變成東德果啲國有企業,無幾間可以自己生存落去。喺東德一眾國有企業裡面,極少數可以喺兩德統一後生存落去,最出名果間係Carl Zeiss分裂出嚟嘅Jenoptik可以生存到今日,甚至成為北約主要軍備供應商(佢本來係華約成員),但原因係德國人嘅認真個性,同埋Jenoptik本來有Jena為總部嘅Carl Zeiss嘅基礎。呢兩樣,契丹都唔具備。

發表迴響

你的電子郵件位址並不會被公開。 必要欄位標記為 *