黃嘉熙

黃嘉熙 案:香港幾時惡化到有人為權殺記者

今日發生一宗對好多評論人或記者好得人驚嘅新聞,喺將軍澳工業邨對開海面,發現一具浮屍,證實係香港電台記者 黃嘉熙 ,佢頭部有傷痕,但身上現金仲喺度,呢單明顯唔似老笠,而係買凶殺人,依家警方話係屍體發現案都好,大家對呢單案係乜性質,其實係心裡有數。

黃嘉熙 查緊乜嘢而被人買凶殺咗?

有人話 黃嘉熙 曾經採訪過澳門前總檢察長何超明案而出事,雖然澳門都係一個生人勿近嘅地方,但如果就咁推論到同澳門有關,好明顯係中咗凶手嘅計,因為佢平日走港聞政治beat多,而且澳門啲巨貪問題,要驚都唔會搵個香港電台記者出手,同埋何超明一個已經被崔世安捉咗嘅人,有乜嘢把炮可以可以買凶殺一個香港政府任職嘅記者,我真係非常有疑問。

黃嘉熙 生前係跟緊乜嘢case,約緊乜人做訪問,呢個係一條線索,因為依家凶案發生時事,啱啱係香港特首選舉嘅時間,你搞單咁嘅謀殺案,仲要殺一個港聞記者,究竟係有人想恐嚇香港傳媒,想香港傳媒喺選舉期間收聲,定係 黃嘉熙 手上查緊或採訪緊嘢有啲堅料喺手,有人為咗自己繼續上位,所以不惜買凶殺咗個記者,香港警察唔可以當無件事,純粹係屍體發現案就想hea過公眾,香港市民係有充分合理懷疑,相信 黃嘉熙 嘅死係涉及政治謀殺,而唔係一般嘅命案。

當然,大家都要有心理準備,依家張曉明陣營係高度暴走,庫斯克近日被批鬥, 黃嘉熙 又遇害,依家新聞工作者或評論人,甚至政界人士,應該有最基本嘅資訊防衛,另一方面,做自由身評論人有一個好處,就係有事就肉身不在香港,向契丹或香港黑幫勢力無咁成熟嘅地方移過去,我睇嚟呢個可能係唯一保到安全嘅方法,以香港樓價咁貴,加上中共權鬥越鬥越不穩,香港涉及以天文數字計嘅利益,為咗天文數字計嘅利益,華人社會就係會姦淫擄掠無惡不作。依家睇嚟已經惡化到有人為權為利殺記者,遲吓我唔知仲有乜事會發生喇。特別依家警察被洗腦到咁,有幾多警察係真正為撲滅罪行,保持政治中立,對任何罪案調查到底,呢點我好懷疑。警察被洗腦,往往係社會大亂之始,但好多人仲未知依家有幾大鑊咁。

發表迴響

你的電子郵件位址並不會被公開。 必要欄位標記為 *