薯仔政治

薯仔政治 :香港最後嘅立憲派

喺曾俊華宣布參選後,固然有一大堆薯粉(曾俊華嘅支持者),但有班人自稱薯仔,喺呢次無機會投票嘅選舉大力支持曾俊華。呢班人,有部分我認識,我姑且分析呢種 薯仔政治 。如果呢次選舉,仍然係林鄭月娥當選嘅話,立憲派同革命派合流係無可避免,我睇唔到香港唔會大亂嘅可能性。

薯仔政治 本質:維新仍然係好

薯仔政治 嘅光譜幾有趣,有明顯親泛民嘅黃絲,亦有本來偏向自由黨相對保守嘅人,薯仔嘅特色在於,佢地追求善治,佢地知曾俊華未必會帶到全面民主,但至少佢係大清帝國嘅光緒皇帝,如果改革成功,就可以避免流血,維持現有框架下達到佢地想要嘅目標,支持改革,都係想走向美好社會過程之中,儘量少人命死傷,家破人亡,呢個願望其實係十分之好。

如果 薯仔政治 成功嘅話,曾俊華上台,然後走向緩步類似康有為、梁啟超嘅改革,咁可以唔需要改變香港嘅宗主國,維持一國兩國框架步向民主,呢條路好理想。正如唔少人評論大清帝國歷史果陣,都會認為,如果當年光緒皇帝嘅維新無失敗,大清帝國未必好似日本帝國走向君主專政,但君主立憲嘅多民族國家係有可能。當然,當時大清帝國失敗唔係無原因,一如鄂國曼帝國嘅改革都走向失敗,1918年一次大戰一結束,鄂圖曼帝國同奧匈帝國一樣,都走上咗瓜分嘅命運。

依家 薯仔政治 會唔會成功,好睇北京嘅政治智慧,仲要睇埋習近平有無呢個實力同江系拗手瓜。如果 薯仔政治 成功,香港政治嘅激進走向會暫停,泛民同「建制」又會有新分野。但如果 薯仔政治 唔成功,大棚失望嘅薯仔薯粉真係可以對世事置諸不理?大清帝國覆亡史,正正係立憲派同革命黨合流嘅結果,喺四川保路風潮裡面分進合擊,令湖北武昌防衛空虛,1911年10月10日新軍一次賭撚行動裡面,竟然有人賭贏咗,大清帝國由此無厘頭瓦解,由成班本來係大清帝國漢人官僚嘅人掌權。咁未來三十日,香港政局會有點嘅變化,我同意劉細良嘅判斷,係要大家關注。如果用大清帝國嚟比較當下嘅香港, 薯仔政治 或曾俊華嘅出擊,係救港最後一擊,如果呢一擊失敗,大家只能睇事態急速惡化,乜事都會發生。

發表迴響

你的電子郵件位址並不會被公開。 必要欄位標記為 *