林鄭月娥-接信

林鄭月娥 對接信嘅態度:根本未準備好做民選政客

今朝有班左膠,喺 林鄭月娥 出席活動度交請願信,當然,大家都知啲左膠好煩。但 林鄭月娥 話因為個會就嚟遲到,請願信係小事,所以佢唔接喇。由呢一點,可以睇到 林鄭月娥 依家嘅心態,仲係官到無求膽自大果隻,唔駛向人民負責嘅態度,呢個人做特首,只會用好狂妄嘅態度面對市民。

林鄭月娥 可以事後寸左膠,但信你無得唔接

英國政客把口,一向都係臭到一個點,呢個固然同下議院果個同中大學生會代表會一樣咁混亂嘅街市環境有關,果個根本係全世界最難打嘅表演場地嚟,但另一方面,英國人對民選政客係好有要求,你試吓咁囂張唔接信,反對黨會唔會抽水抽到你變人乾。所以英國政客,或全世界民主政黨嘅政客,大部分都係,信就接咗先,但事後點寸到你一棟都無,就後話喇。

依家 林鄭月娥 話唔接信,怕遲到,呢個係政務主任果陣可以咁講,如果政務主任為咗接請願信,搞到見到NGO等遲到,呢個係唔多好,但你依家乜唔係轉咗型係政客嚟嘅咩?連show都唔識做,呢個係一個例證。

好多時,講乜嘢關公災難,其實關公災難好多時嘅最根本根源,係個client並唔認識自己嘅位置,所謂公關,第一步係客戶認識到自己嘅位置,你嘅受眾預期要啲乜,大家預期民選政客,特別彭定康之後,大家都係用彭定康嘅尺嚟接,就係接信幾小事,都要接咗先,再講兩句。公眾對每一樣嘢,都有佢自己嘅stereotype,你就要按啲公眾呢個stereotype,以及所衍生嘅心理預期,見步行步,呢個未必會建立到好嘅公關形象,但一定唔會搞出公關災難。而通常角色轉換係痛苦,所以要適應。

香港政制已經不倫不類,上高位嘅政客,十之八九未經民選歷練,或者喺中聯辦扶植吓,好容易贏到勝仗,以為自己曉飛,唔知乜嘢係世界難撈,所以就一路撞板。平心而論,葉劉淑儀叫好少少,至少佢出戰過幾次直選,但都係因為特首之戰,中聯辦當佢垃圾咁處理,用完即棄,至明白原來佢自己並唔係本來咁勁,亦開始明白民意民怨走出嚟嘅由因(但條友無guts,咪對佢有乜期望)。所以香港咁多未準備好做民選政客嘅人掌權,關公災難將會沒完沒了。

發表迴響

你的電子郵件位址並不會被公開。 必要欄位標記為 *