大秦帝國之崛起-min

大秦帝國之崛起 後面嘅中共黨內叛變

最近契丹中央電視台有套電視劇,叫 大秦帝國之崛起 ,內容有無玩共產黨內容我唔知,但道具果度,就真係明玩人, 大秦帝國之崛起 有一幕講趙國奸臣榜,一揭張名單,唔識古代小篆字果啲,就只係知道有堆古字,但識睇小篆果啲,就笑咗,因為全部都係胡錦濤、溫家寶、習近平果啲人,所以中央電視台立即喺全球範圍用任何方式想收番段片。

其實呢次,似係中央電視台後面有太子黨嘅人,或江系嘅人,存心發放作反訊號,契丹局勢喺花生背後,十分凶險。

大秦帝國之崛起 趙國奸臣榜係無江系中人名字

喺契丹,趙家人、趙國人,魯迅小說筆下嘅高級官僚,即係中共嘅人,你依家話趙國奸臣榜,即係話胡錦濤、溫家寶、習近平呢啲友仔,通通都係反黨集團,呢啲唔係民怨,係故意嘅,擺明係共產黨啲人做嘅高級黑。點解我可以幾肯定係中央電視台高層知情下有心玩膠,因為大家細心留意成份名單,如果講趙國奸臣榜,除咗賈慶林,點解無其他江系嘅人馬,例如江澤民、曾慶紅、張德江、劉雲山(如果有劉雲山,我反而仲會信係民怨),加上呢套嘢播出時間,接近人大政協兩會之前,其實亦係中共十九大人事交鋒嘅時間嚟,所以呢劑並唔似民間玩膠,相反,呢劑係有政治訊號喺後面,甚至係為號召鏟除習近平嘅政變作出準備,果張準確嚟講,查實係清算名單嚟。雖然契丹人民唔知小篆係乜,但中央電視台啲人,絕對知道小篆係乜嚟,尤其拍歷史劇果啲,更加唔係剪片果陣,喺高清下咁sharp咁清楚都俾佢出街,呢個唔係政變訊號,我真係睇唔到係乜嚟。

其實你由江系同習系喺香港爭奪戰裡面果啲手段,你可以睇到,江習大戰,其實已經喺攤牌邊緣。張德江、張曉明果種暴走,係好似好急咁要穩住某啲權力,甚至係當政權保衛戰咁打,相信江習之間,一直未能夠為十九大嘅人事問題達致妥協或共識,如果呢個情況持續落去,就真係會搞出政變出嚟,而中央電視台歷史劇裡面呢個畫面,其實係一個宣戰訊號,依家中宣部要收番啲片,其實只係扮嘢,因為目標已經達到,如果我係習近平,實會搵劉雲山問話,問清楚佢想點,各位小心北京或契丹任何異動,呢個年代乜都可以發生。

發表迴響

你的電子郵件位址並不會被公開。 必要欄位標記為 *