特首選舉-min

特首選舉 係秘密嘅:中共最怕

中聯辦為控制選舉,無所不用其極,中聯辦為怕有人改投曾俊華,夠膽死要求選委投票果陣影低選票。 特首選舉 都要宣傳投票係秘密的嚟對付中共呢啲茅招。

由新加坡獨立公投到依家,中共呢方面,堅係死性不改。

特首選舉 係秘密嘅一定要大肆宣傳

新加坡你點鬧佢唔算民主都好,有一樣嘢,新加坡做得絕對徹底,而且十分好,就係宣傳同執行投票係秘密呢樣嘢,係絕對做到十足十。新加坡係連古惑票箱可能性都唔存在,因為新加坡啲票箱係紙箱嚟,係即場(無錯,即場),喺候選人嘅代表面前組裝,封好,唔會循環再用(點完票,直接封入法院,夠期就銷毀),亦無任何窿可以做手腳或睇到裡面啲票。新加坡係不斷宣傳投票係秘密嘅,連反對黨都係一樣咁宣傳,因為馬共(即係中共)成日叫人亮票,藉此恐嚇選民,啲華裔選民夠薑支持李光耀,靠就係不斷強調中共唔知你投咗乜票,放心支持人民行動黨喇,否則一早新加坡赤化咗。香港就係呢方面宣傳唔夠,有啲人,特別教育程度唔高果啲,就會被人老點,土共唔少票就係咁呃返嚟。當你知道南洋政治史,就知共產黨呢啲仆街技倆,真係千年不變。否則我唔會喺中大學生會院委同選舉附則,特別強調不記名投票,我寫章果陣,就係刨緊新加坡歷史,睇李光耀點對付班馬共。

當然,香港情況有啲唔同,你都知香港啲商界幾無知兼無膽,我可以教條狗招,如果中聯辦班友係都要你影票嘅,你就影完後,整污糟張票,變成廢票,我都會懷疑中聯辦有人混入做選舉官員,唔緊要,當大堆無厘頭塗污咗嘅選票出現果陣,大家都知中聯辦班友又玩嘢,屆時叫張曉明條仆街慢慢向全世界解釋,你班共產黨喺香港搞咗乜嘢好事出嚟。我相信民主300+唔會投啲膠票,土共果啲,林鄭提名都有七張DQ,呢班文盲應該會做出唔少令人食花生嘅事。但最重要係商界,商界應當學係田大少,田大少好多嘢都唔同意,但喺對抗中聯辦呢方面,佢係香港頭幾名嘅硬漢之一,呢樣係唔駛講,做生意人,至少要似田大少咁,至唔會俾共產黨恰到上心口。共產黨係欺善怕惡,呢樣大家要記住。

One thought on “特首選舉 係秘密嘅:中共最怕

發表迴響

你的電子郵件位址並不會被公開。 必要欄位標記為 *